VOV4.Êđê- Hruẻ 14/6, Anôk gĭr gai hdră gang mkhư̆ klei ruă tưp ti mnuih hlăm čar Dak Nông hưn mdah lehanăn akâo kơ Anôk bruă Đảng čar, Anôk bruă sang čư̆ êa čar Dak Nông ksiêm dlăng bruă bi êdu dŭm hdră msir gang mkhư̆ klei ruă Covid 19 kñăm hluê ngă bruă klam mdua, gang mkhư̆ klei ruă Covid 19 êjai lehanăn mtrŭt mđĭ kyar bruă duh mkra – ala ƀuôn êjai. Hluê anăn, čar Dak Nông srăng ksiêm dlăng bruă lŏ brei pŏk ƀăng dŭm hdră dŭ mdiăng tuê mlir čar msĕ yang đar hŏng dŭm krĭng amâo mâo mnuih ruă amâo dah dŭm čar mâo klei ruă ƀiădah êgao leh 14 hruê amâo mâo mnuih ruă mrâo.

Dŭm anôk bruă mnia mblei, čhĭ mnơ̆ng ƀơ̆ng huă, huă mnăm... dưi ngă bruă msĕ aguah tlam ƀiădah brei rơ̆ng kjăp hdră gang mkhư̆ klei ruă Covid 19; klei bi kuôl ung mô̆ dưi mkŏ mjing ƀiădah amâo dưi bi kƀĭn lu mnuih êgao kơ 30 čô mnuih. Khă snăn, čar Dak Nông mtă kơ dŭm alŭ wăl brei ksiêm dlăng kjăp klei dôk mâo mơ̆ng klei ruă hlăm alŭ wăl, pral mprăp djăp klei găl, kdrăp mnơ̆ng kñăm mdrơ̆ng hŏng djăp boh klei bluh mâo mbĭt anăn mtă kơ mnuih ƀuôn sang lŏ hluê ngă kjăp 5 Asăp mtă mơ̆ng Phŭn bruă mdrao mgŭn./.

Pô mblang: H’Nêč Êñuôl