VOV4.Êđê- Hruê 20-7, Anôk bruă gĭt gai gang mkhư̆ klei ruă tưp kơ mnuih čar Dak Nông kwang dar leh Anôk bruă Knơ̆ng bruă sang čư̆ êa să Quảng Sơn, kdriêk Dak Glong, kyua bi mklă mâo mnuih ruă Covid-19 nao mă bruă tinei. Klă klơ̆ng, hmư̆ klei hâo hưn mơ̆ng Anôk bruă ktuê dlăng klei ruă tưp čar Dak Lak hưn kơ sa čô mnuih đing djŏ klei ruă Covid-19 ti Dak Lak hưn hruê 13-7 nao ti să Đức Xuyên, kdriêk Krông Knô leh anăn să Quảng sơn, kdriêk Dak Glong, bi tuôm hŏng dŭm čô mnuih.

Čar Dak Nông mtă dua să Đức Xuyên leh anăn Quảng Sơn mjêč čuăn krĭng, ksiêm dlăng, hiu duah, bi ktlah hjăn hluê si klei kčah mtrŭn hŏng phung djŏ tuôm, bi tuôm giăm. Čar mtă brei kwang dar mtam anôk bruă Knơ̆ng bruă sang čư̆ êa să čiăng rơ̆ng kơ hdră gang mkhư̆ klei ruă tưp, mjêč ksiêm dlăng, hiu duah phung bi tuôm giăm, djŏ tuôm kyua hlăm hrue 13-7, mnuih ruă Covid-19 nao ti Anôk bruă Knơ̆ng bruă sang čư̆ êa să Quảng Sơn čiăng blŭ hrăm kơ bruă knuă.

Pô mblang: H’Zawut Ƀuôn Yă