VOV4.Êđê- Leh hmao ƀuh êpul êya mâo klei ruă tưp Covid-19 hlăm yang ƀuôn ti să Quảng Tín, kdriêk Dak R’Lâp, k’iăng khua bruă sang čư̆ êa čar Dak Nông Tôn Thị Ngọc Hạnh bi klă dưn yua dŭm hdră êlan mjêč hlăm bruă gang mkhư̆ klei ruă tưp Covid-19 hlăm alŭ wăl. Tui hluê anăn, čar Dak Nông bi klă kwang dar, bi ktlah kluôm kdriêk Dak R’Lâp mơ̆ng 12 mmông hruê 7/9 lehanăn dưn yua ktang phĭt dŭm hdră êlan hlăm asăp mtrŭn mrô 1. Mtă kơ mnuih ƀuôn sang dôk ti sang, knŏng kbiă ti tač tơdah mâo bruă mjêč. Mdei jih jang bruă hlăm êpul êya yang ƀuôn. Bi hrŏ jih hnơ̆ng êdeh êdâo, rơ̆ng bruă dŭ mdiăng mnơ̆ng dhơ̆ng, mnơ̆ng yua bruă mkra mjing. Tui si klei hưn mdah mơ̆ng êpul gĭt gai bruă gang mkhư̆ klei ruă tưp kdriêk Dak R’Lâp, mơ̆ng hruê 5/9 leh hmao ƀuh êpul êya mâo klei ruă tưp hlăm yang ƀuôn ti să Quảnh Tín, truh kơ aguah 7/9. Hlăm kdriêm mâo 52 čô mâo klei ruă tưp Covid-19, hlăm anăn lu hĭn ti 2 ƀuôn Bu Dzách, Bu Bir hlăm să Quảng Tín. Ară anei, knơ̆ng bruă mdrao mgŭn dôk ksiêm duah, tui duah, mă mta ksiêm mkă kman kơ êbeh 6.200 čô djŏ tuôm, tuôm jĕ giăm čiăng mbĕ mđuê̆ jih jang phung mâo klei ruă tưp kbiă mơ̆ng êpul êya yang ƀuôn.

Pô mblang: Y-Ƀel Êban