VOV4.Êđê- Tlam hruê 2/8, ti anôk bi ktlah mdrao klei ruă Covid 19 mơ̆ng čar Dak Nông, anôk bruă mdrao mgŭn čar anei jao leh hră bi mklă dưi kbiă mơ̆ng sang êa drao leh sa wưng dŏng mdrao. Dua čô ruă dưi kbiă mơ̆ng sang êa drao hlăm gưl anei, jing pô ruă mrô 26004 Đ.Q.N. (kkiêng thŭn 1995, dôk ti wăl krah Krông K’Mar, kdriêk Krông Bông, čar Dak Lak) jing pô mgăt êdeh mdiăng mnơ̆ng mơ̆ng ƀuôn prŏng Hồ Chí Minh wĭt kơ ƀuôn prŏng Ƀuôn Ama Thuôt, čar Dak Lak.

Pô dưi kbiă mơ̆ng sang êa drao tal 2 jing pô ruă mrô 31604 C.T.Q (kkiêng thŭn 1966, dôk ti alŭ 7, să Dak Wer, kdriêk Dak Rlâp, čar Dak Nông). Hluê si hdră dŏng mdrao mơ̆ng Phŭn bruă mdrao mgŭn, jih dua čô anei suaih leh mbĭt anăn mâo djăp klei găl dưi kbiă mơ̆ng sang êa drao. Êlâo anăn, čar Dak Nông ăt jao leh hră bi mklă dưi kbiă mơ̆ng sang êa drao kơ pô ruă 40924 V.H.L.E (kiêng thŭn 1991, dôk ti să Mỹ An, kdriêk Chợ Mới, čar An Giang). Tĭng truh tlam hruê 2/8, čar Dak Nông mâo 89 čô djŏ klei ruă Covid 19 ti 7 kdriêk, wal krah, ƀuôn prŏng./.

Pô mblang: H’Nêč Êñuôl