VOV4.Êđê - Tlam hruê 22-7, čar Dak Nông mâo mnuih tal 19 djŏ klei ruă Covid-19 hlăm êpul êya. Anei jing mnuih ruă ka thâo ôh phŭn mtưp. Mnuih ruă jing mniê N.T.B kkiêng thŭn 1975, ti alŭ 2, ƀuôn hgŭm Nghĩa Tân, ƀuôn prŏng Gia Nghiã, čar Dak Nông. Mnuih ruă dưi ƀuh mơ̆ng bruă ksiêm mkă ti Sang êa drao prŏng čar Dak Nông, test pral leh anăn ƀuh kman Sars -Cov- 2, lŏ dơ̆ng mă mta ksiêm mkă mơĭt kơ Anôk bruă ksiêm dlăng klei ruă tưp ksiêm mkă RT-PCR jing djŏ kman Sars -Cov- 2. Hluê si klei ksiêm dlăng klei ruă, pô anei čhĭ mnia, knŏng hdĭp mda ti alŭ wăl, amâo bi tuôm ôh hŏng phung mgăt êdeh mdiăng mnơ̆ng găn/hriê dŭm čar mâo klei ruă tưp Covid-19 msĕ si Bình Dương, Đồng Nai, Dak Lak.

Leh mâo klei tŭ ksiêm mkă djŏ kman Sars -Cov- 2, bruă mdrao mgŭn ba mnuih ruă nao ti wăl bi ktlah hjăn mdrao klei ruă Covid-19 ti čar. Dŭm êpul pral ksiêm dlăng hdră êrô êbat leh anăn ƀuh 24 čô bi tuôm giăm. Ară anei êpul bruă djŏ tuôm lŏ dơ̆ng hiu duah dŭm anôk pô anei tuôm nao/ hriê/dôk hlăm 14 hruê êlâo.

H Zawut pô mblang