VOV4.Êđê- Klei bi lông hriăm jih gưl 3 thŭn 2021, čar Dak Nông mâo 7 êbâo čô hđeh nao bi lông. Mbĭt hŏng bruă mkŏ dăp anôk bi lông, adŭ bi lông, Knơ̆ng bruă sang hră m’ar mtô bi hriăm čar Dak Nông mâo leh giăm 1 êbâo čô knuă druh dlăng klei bi lông, mâo phung knuă druh, phung mă bruă hlăm anôk bruă mtô bi hriăm, kahan ksiêm, lĭng kahan lehanăn phung mă bruă mdrao mgŭn nao hgŭm. Ară anei anôk bruă sang hră m’ar mtô bi hriăm hưn mthâo leh klei bhiăn bi lông, mjuăt bi hriăm kơ phung knuă druh, nai mtô, mnuih mă bruă mkăp kơ hdră dlăng klei bi lông.

Phung hđeh nao bi lông dưi mjing djăp klei găl kơ anôk bi lông kñăm mkiêt mkriêm hruê mmông găn êrô, amâo mâo kbưi. Ti dŭm anôk bi lông, hdră ksiêm dlăng, thiăm mbŏ dŭm mta mnơ̆ng adôk kƀah, mkra mlih mnơ̆ng dhơ̆ng jhat rai mâo leh anôk bruă djŏ tuôm mjêč hluê ngă, rơ̆ng kjăp klei kčah mtrŭn kơ anôk bruă nah gŭ, rơ̆ng klei êđăp ênang kơ gưl bi lông. Boh nik, ti anăp klei ruă Covid 19 dleh dưi ksiêm dlăng, knơ̆ng bruă sang hră m’ar mtô bi hriăm čar Dak Nông gĭt gai leh dŭm anôk bruă mtô bi hriăm kriê dlăng kjăp phung hđeh nao bi lông gưl 3, mtă kơ phung hđeh lehanăn gŏ sang amâo nao ti čar mkăn, boh nik ti krĭng dôk mâo klei ruă tưp./.

Pô mblang: H’Nêč Êñuôl