VOV4.Êđê- Tlam mbruê, ti anôk bruă kahan ksiêm čar Dak Nông, phŭn bruă kahan ksiêm mkŏ mjing leh knăm bi klă mơ̆ng khua phŭn bruă kahan ksiêm kơ bruă tiŏ nao knuă druh. Hlăm knăm anăn, Trung tướng Trần Quốc Tỏ, k’iăng khua phŭn bruă kahan ksiêm ba jao leh klei bi mklă mơ̆ng phŭn bruă kahan ksiêm tiŏ nao Đại tá Bùi Quang Thanh, k’iăng khua kiă kriê kahan ksiêm čar Quảng Bình ngă bruă khua kiă kriê kahan ksiêm čar Dak Nông.

Blŭ hlăm knăm anăn, Trung tướng Trần Quốc Tỏ mâo klei đăo knang, hlăm bruă klam mrâo, anôk mă bruă mrâo, khua kiă kriê kahan ksiêm čar Dak Nông mrâo Bùi Quang Thanh hmar thâo klă alŭ wăl, bruă mă, hnưm bi djŏ hŏng bruă Đảng čar, êpul kiă kriê kahan ksiêm čar, gĭt gai kơ êpul êya kahan ksiêm čar Dak Nông dưi ngă leh bruă klam, mkŏ mjing anôk dôk jăk, đru hlăm bruă mđĭ kyar klei duh mkra ala ƀuôn hlăm čar Dak Nông.

Pô mblang: Y-Ƀel Êban