VOV4.Êđê - Tlam hruê 15/7/2021, čar Dak Nông lŏ mâo mnuih tal 5 djŏ klei ruă Covid 19 jing pô mgăt êdeh mdiăng mnơ̆ng găn alŭ wăl čar. Pô ruă anei jing êkei, mrô 40924 anăn V.H.L.E, kkiêng thŭn 1991, dôk ti alŭ Mỹ Long, să Mỹ An, kdriêk Chợ Mới, čar An Giang. Leh nao găn čar Dak Nông dưi ksiêm dlăng pral lehanăn boh tŭ dưi bi mklă djŏ kman SARS-CoV-2 hlăk 9h15’ hruê 15/7/2021. Pô ruă anei mâo leh anôk bruă mdrao mgŭn mă mta ksiêm dlăng ba kơ Anôk bruă ksiêm dlăng klei ruă tưp čar bi mklă hluê kdrăp RT-PCR lehanăn boh tŭ bi mklă djŏ kman hlăk 16h45’ hlăm hruê. Pô ruă anei dưi mdiăng hŏng êdeh thơ̆ng mdiăng mnuih ruă ba nao ti anôk bi ktlah dŏng mdrao mnuih ruă Covid 19 mơ̆ng čar. Leh mâo mnuih ruă, êpul djŏ tuôm tui duah leh 4 čô bi tuôm guăm lehanăn dôk hluê ngă hdră bi ktlah čiăng ksiêm dlăng kman. Mbĭt anăn anôk bruă mdrao mgŭn dôk hluê ngă hdră bi mdjiê kman kluôm krĭng dôk gak ti Cai Chang lehanăn krĭng ksiêm dlăng kman pral mơ̆ng Anôk bruă mdrao mgŭn kdriêk Dak Rlâp./.

H Nêč pô mblang