VOV4.Êđê- Truh ară anei, kluôm čar Dak Nông mđĭ kyar 230 êpul hgŭm bruă, hŏng 18 êbâo čô hgŭm. Hluê si Knơ̆ng bruă sang čư̆ êa čar Dak Nông ksiêm dlăng, dŭm êpul hgŭm bruă bi mđĭ gru hmô ngă bruă hluê si Hdră bhiăn êpul hgŭm bruă 2021 mâo klei mlih mrâo, ƀrư̆ hruê pŏk mlar leh anăn mđĭ kyar, đru bi mlih ƀô̆ mta krĭng ƀuôn sang. Thŭn 2021, prăk hrui wĭt kah knar mơ̆ng dŭm êpul hgŭm bruă ti Dak Nông mâo giăm 1 êklai 5 êtuh êklăk prăk, mjing bruă ma kơ giăm 4000 čô mnuih mă bruă hŏng hnơ̆ng hrui wĭt kah knar 70 êklăk prăk/mnuih.

 Tiu doh mŏng Êpul hgŭm bruă Hoàng Nguyên ti Dak Song grăp thŭn ba hčĭ dŭm êtuh ton kơ krĭng Ơ Rôp

Boh nik hlăm bruă lŏ hma, dŭm epeul hgŭm bruă dôk jing anôk phŭn hlăm hdră tă mkŏ mjing leh anăn krĭng lŏ hma ba yua kdrăp mrâo ti čar, bi hgŭm mnuih ƀuôn sang mkra mjing hluê hdră ênoh yuôm. Čar mkŏ mjing 8 krĭng mkra mjing lŏ hma ba yua kdrăp mrâo, mâo leh 12 mta mnơ̆ng dhơ̆ng hlăm dŭm êpul hgŭm bruă djăp hnơ̆ng čuăn 3-4 mtŭ hlăm hdră grăp să sa mta mnơ̆ng (OCOP), dưi ba čhĭ kơ dŭm ala čar ti Ơ Rôp.

Pô mblang: H’Zawut Ƀuôn Yă