VOV4.Êđê- Êpul djŏ tuôm čar Dak Nông hluê ngă leh hdră kwang dar sa sang hră lehanăn lu anôk djŏ tuôm ti kdriêk Dak Rlâp, leh mâo sa čô hđeh djŏ kman SARS-CoV-2. Mbĭt anăn, anôk bruă mdrao mgŭn pral mă mta ksiêm dlăng kñăm tui duah F0 ba bi ktlah mơ̆ng êpul êya. Hluê si klei hưn mdah mơ̆ng Anôk gĭt gai hdră gang mkhư̆ klei ruă tưp čar Dak Nông, leh mâo sa čô hđeh ti Sang hră čiêm rông hđeh mnuih djuê ƀiă Dak Rlâp, ti ƀuôn Bu Bir, să Quảng Tín, kdriêk Dak Rlâp djŏ kman SARS-CoV-2, êpul djŏ tuôm mjêč čuăl krĭng, pral tui duah, mă mta ksiêm dlăng. Ară anei anôk bruă mdrao mgŭn duah ƀuh leh êbeh 150 čô F1, êbeh 100 čô F2 lehanăn ară anei mâo 15 čô mâo boh tŭ ksiêm dlăng hluê kdrăp RT-PCR djŏ kman SARS- CoV-2. Anôk bruă sang čư̆ êa kdriêk Dak Rlâp bi mklă ba yua leh asăp mtrŭn bi ktlah yang ƀuôn hluê Asăp mtrŭn mrô 16 hŏng kluôm să Quảng Tín./.

Pô mblang: H’Nêč Êñuôl