VOV4.Êđê- Dôk hlăm wưng mđiă hlơr ktang, ênoh yua pui mklă grăp hruê ti čar Dak Nông dôk đĭ truh 1,5 blư̆ mkă hŏng yang đar, truh kơ 2 êklăk kWh lehanăn hnơ̆ng yua pui kmlă truh kơ 100 MW. Čiăng rơ̆ng kơ klei êđăp ênang hlăm pui kmlă, knơ̆ng bruă pui kmlă čar Dak Nông gĭt gai leh kơ dŭm anôk bruă mâo klei ksiêm dlăng 24/24, lŏ dăp mbha mnuih mă bruă huĭdah tăp mâo hĕ klei truh. Mbĭt anăn, lŏ mđĭ bruă mkră wĭt, bi mlih, čiăng mđĭ hnơ̆ng pui kmlă kơ dŭm boh masin bi mlih hnơ̆ng pui kmlă, êlan klei pui leh mtrŭn hnơ̆ng pui kmlă hlăm dŭm anôk mâo lu mnuih, jah waih anôk êlan klei pui, bi mlih aptomat…gang mkhư̆ amâo dưi brei mâo klei truh kyua yua pui kmlă êgao hnơ̆ng.

Dŭm alŭ wăl srăng čŏng mkŏ mjing dŭm hdră êlan rơ̆ng mgang pui kmlă kơ dŭm mnơ̆ng đru kơ pui kmlă yuôm hĭn, tiŏ nao pô kiă kriê dŭm anôk pui kmlă 110 Kv, dŭm anôk mkra mjing pui kmlă hŏng ai êa điêt srăng bi mlih hdră êlan ba pui kmlă tui hluê êlan klei mâo hnơ̆ng pui kmlă man dưn tuôr ngă nanao. Êngao kơ anăn, knơ̆ng bruă pui kmlă čar Dak Nông mta kơ mnuih ƀuôn sang ngă dŭm hdră êlan mkiêt mkriêm pui kmlă msĕ si: mdjiê hĕ dŭm kdrăp êlan pui kmlă amâo yua, bi hrŏ yua masin bi êđăp êwa.

Pô mblang: Y-Ƀel Êban