VOV4.Êđê- Hruê 26/4, čar Dak Nông mkŏ mjing leh klei tlŏ mgang vaccine gang mkhư̆ klei ruă Covid-19 êlâo hĭn kơ dŭm čô Aê mdrao, nai mdrao, phung mă bruă bruă mdrao mgŭn hlăm bruă gang mkhư̆ klei ruă gưl tal êlâo. Sang êa drao prŏng Dak Nông leh anăn anôk bruă mdrao mgŭn ti ƀuôn prŏng Gia Nghĩa jing dua anôk bruă mâo klei tlŏ mgang vaccine Covid-19. Mâo 100 čô mnuih dưi mâo klei tlŏ mgang hlăm aguah 26/4 djŏ hŏng hdră êlan mơ̆ng phŭn bruă mdrao mgŭn. Leh kơ klei tlŏ ngang dưi lŏ mâo klei ksiêm dlăng hlăm ƀrô 30 truh kơ 60 mnĭt huĭdah mâo klei amâo jăk. Mbĭt hŏng anăn ăt mâo klei mtô ksiêm dlăng klei suaih pô hlăm 7 hruê. Tui hluê knơ̆ng bruă mdrao mgŭn čar Dak Nông, klei tlŏ mgang srăng mkŏ mkra mơ̆ng hruê 26/4 truh kơ 12/5, dưi mkŏ mjing ti 8 anôk bruă. Hlăm gưl tlŏ mgang tal êlâo, phŭn bruă mdrao mgŭn dưi mbha leh kơ čar Dak Nông 9.000 hnơ̆ng vaccien Covid-19 mơ̆ng knơ̆ng bruă AstraZeneca. Dak Nông srăng yua hlăm bruă tlŏ kơ dŭm čô mnuih dôk hlăm bruă gang mkhư̆ klei ruă gưl êlâo hĭn.

Pô mblang: Y-Khem Niê