VOV4.Êđê - Trịnh Quang Trí, khua anôk bruă kiă kriê klei ruă čar Daklak brei thâo, 56 čô jing F1 mơ̆ng mnuih ruă mrô 15921 ti Daklak mâo leh klei tŭ dưn bruă mkă dlăng tal sa amâo mâo ƀuh ôh kman Sar Cov 2. Mnuih ruă mrô 15921 mâo ti čar Daklak hlăk hrue 28/6, kbiă hriê mơ̆ng ƀuôn prŏng Hồ Chí Minh wĭt kơ Daklak. Djŏ tuôm hŏng mnuih ruă anei, tal êlâo, dhar bruă mdrao mgŭn bi mguôp leh hŏng bruă sang čư̆ êa alŭ wăl tui mă jih mnuih mâo truh 56 čô jing F1, mâo hlăm anăn: 28 čô jing mnuih jĕ giăm găp djuê, sang riêng gah; 4 čô knuă druh êa drao; 20 čô mnuih đĭ êdeh mbĭt mơ̆ng ƀuôn prŏng Hồ Chí Minh wĭt kơ Daklak; 4 čô mnuih hlăm sa boh sang dôk mbĭt ti să Vĩnh Lộc A, kdriêk Bình Chánh, ƀuôn prŏng Hồ Chí Minh. Truh ti wưng anei, jih jang 56 čô mrâo lač anăn hlăk dôk bi ktlah hlăm sa anôk, lehanăn mă mta mkă dlăng kman sar Cov 2 gưl tal êlâo amâo mâo ƀuh kman ôh./.

Y Khem pô mblang