VOV4.Êđê - Ti ƀuôn prŏng Ƀuôn Ama Thuôt, čar Dak Lak ară anei dôk mâo sa anôk bruă tuh tia mkra mjing lehanăn 2 wăl tuh tia mkra mjing mâo hlăm brô 4.000 čô mnuih dôk mă bruă. Ti anăp klei mâo dleh dưi ksiêm dlăng mơ̆ng klei ruă Covid 19, dŭm anôk bruă, sang maĭ, êpul êya bruă hluê ngă leh kjăp klei gĭt gai mơ̆ng gưl dlông ăt msĕ mơh mơ̆ng alŭ wăl kñăm rơ̆ng klei êđăp ênang kơ mnuih mă bruă ăt msĕ mơh hdră bruă duh mkra mnia mblei.

Knơ̆ng bruă msei Ngŏ Dhŭng Asi ti alŭ wăl duh mkra Hoà Phú, ƀuôn prŏng Ƀuôn Ama Thuôt, čar Daklak mâo êbeh 600 čô knuă druh, mnuih ngă bruă hlăk dôk mă bruă. Aduôn Lê Thị Tuyết Hạ - k’iăng khua knơ̆ng bruă lač, klei duh mkra mnia mblei mơ̆ng anôk bruă anei nao mđrĭng hŏng bruă gang mkhư̆ klei ruă tưp, snăn tui ngă 5 mta klei mtă kơ bruă mdrao mgŭn, truh hŏng djăp êpul bruă, anôk mă bruă.“Tal êlâo jing hlue ngă 5 mta klei mtă mơ̆ng phŭn bruă mdrao mgŭn. Lehanăn knơ̆ng bruă mtă kơ jih jang mnuih mŭt kbiă hlăm knơ̆ng bruă bi hưn mthâo kơ klei suaih pral pô, nao găn ti adŭ mdjiê kman, dăp sa êpul kăp drông tue lehanăn mă hră mơar čiăng kơ mnuih mơ̆ng kbưi amâo mâo bi tuôm ôh hŏng mnuih hlăm knơ̆ng bruă. Êngao anăn, hmei ngă klei dôk bi kbưi, mbha bruă hlue mmông ti dŭm anôk ngă bruă; sang huă ƀơ̆ng kơ lu mnuih mâo dăp mkra mtih kgăn... čiăng rơ̆ng dưi gang mkhư̆ klei ruă tưp hŏng klei tŭ dưn, hơĭt kơ klei mă bruă knuă”.

Bi ti knơ̆ng bruă Xuân Hòa jing anôk thơ̆ng kơ bruă tuh tia hlăm alŭ wăl duh mkra Tân An 1, ƀuôn hgŭm Tân Lợi, ƀuôn prŏng Ƀuôn Ama Thuôt ară anei mâo giăm 100 čô mnuih ngă bruă. Ngă bruă gang mkhư̆ klei ruă tưp hŏng klei ktang, knơ̆ng bruă mâo mkŏ mjing leh adŭ mdjiê kman ti ƀăng jang anôk mŭt kbiă; dăp mnuih gak răng kăp mka hnơ̆ng h’uh asei mlei, mtă kơ jih jang mnuih mŭt kbiă mơ̆ng knơ̆ng bruă bi rao kngan hŏng êa mdjiê kman, ktrâo atăt klei hưn mthâo klei suaih pral pô, mbha lehanăn mtă brei truă čhiăm guôm ƀô̆; rŭ mdơ̆ng anôk bi ktlah huĭdah mâo mnuih ruă, lehanăn krih nanao êa drao mdjiê kman hlăm wăl knơ̆ng bruă. Aduôn Trần Thị Thanh Hoa, Khua anôk bruă kiă kriê mnuih ngă bruă hlăm knơ̆ng bruă Xuân Hoà brei thâo, grăp čô mnuih ngă bruă mơ̆ng anôk bruă anei bi hlue gưt djăp ênŭm klei bhiăn gang mkhư̆ klei ruă tưp, wăt leh wĭt hŏng pưk sang, lehanăn klei hdĭp mda hlăm alŭ wăl.“Hmei mtă kơ jih jang mnuih ngă bruă hlăm knơ̆ng bruă tơdah leh jih mmông mă bruă, snăn hlŏng wĭt phŭt kơ sang mtam, amâo mâo lŏ bi tuôm hŏng pô anei, pô adih ôh, knŏng kbiă hiu mơ̆ng sang pô tơdah mâo bruă mjêč, kñăm răng kriê klei suaih pral kơ pô, lehanăn krơ̆ng nanao hnơ̆ng tŭ dưn bruă knuă mă”.

Ti ƀuôn prŏng Ƀuôn Ama Thuôt, čar Daklak ară anei mâo 106 phung duh mkra dôk mă brua hlăm 2 alŭ wăl duh mkra sa anôk, hŏng hlăm brô 4 êbâo čô mnuih mă bruă.

Tui si Đoàn Ngọc Thượng, k’iăng khua knơ̆ng bruă sang čư̆ êa ƀuôn prŏng Ƀuôn Ama Thuôt, ti anăp klei ruă tưp dleh dưi ksiêm dlăng anei, boh nik klei ruă tưp hlăk hlê ñŭ kma prŏng hlăm alŭ wăl duh mkra ti lu alŭ wăl hlăm kluôm ala, ba leh klei luh liê prŏng êdi, knơ̆ng bruă sang čư̆ êa ƀuôn prŏng mtă leh kơ phung duh mkra hlăm alŭ wăl mâo klei gang mkhư̆ klei ruă tưp ti hnơ̆ng prŏng hĭn. Mkŏ mjing êpul ksiêm dlăng jih jang djăp anôk duh mkra. Mơ̆ng anăn, čŏng dưi mdrơ̆ng hŏng jih ai tiê, rơ̆ng dưi bi sĭt bruă ngă mdua anăn jing duh mkra êjai, lehanăn gang mkhư̆ klei ruă tưp êjai hŏng klei tŭ dưn.“Čiăng mâo ngă jăk bruă gang mkhư̆ klei ruă tưp covid 19 hŏng klei tŭ dưn, hlăm wưng kơ anăp ti dŭm anôk duh mkra snăn êlâo hĭn bi hlue ngă jăk bruă hâo hưn čiăng kơ phung duh mkra păn kjăp djăp ênŭm djăp hdră gang mkhư̆ klei ruă tưp tui si klei phŭn bruă mdrao mgŭn ktrâo atăt. Kiă kriê kjăp ênoh mnuih hlăk dôk ngă bruă hlăm dŭm knơ̆ng bruă. Knơ̆ng bruă sang čư̆ êa ƀuôn prŏng ăt srăng ƀrư̆ ƀrư̆ mtă kơ dŭm anôk duh mkra dăp anôk huă ƀơ̆ng mdei msăn, mă bruă ti anăn mtam kơ mnuih ngă bruă tơdah mâo djăp klei dưi, ksiêm dlăng jêñ jêñ êdeh êdâo dŭ mdiăng, boh nik phung mgăt êdeh wĭt dŭm krĭng mâo klei ruă tưp bi dŭ mdiăng mnơ̆ng kơ anôk duh mkra”.

Gưl bluh đĭ klei ruă tưp Covid 19 tal 4 anei, Daklak mâo leh 5 čô mnuih mâo kman sar Cov 2, hlăm anăn mâo leh 4 čô mnuih mdrao hlao, lehanăn kbiă wĭt leh mơ̆ng sang êa drao. Čar ăt dôk bi ktlah sa anôk, ngă klei bi ktlah bruă mdrao mgŭn kơ êbeh 200 čô mnuih jing F1, bi ktlah ti sang êbeh 20 êbâo 500 čô. Čiăng bi hrŏ tuič hnơ̆ng klei huĭ hyưt mơ̆ng klei ruă tưp covid 19 tưp lar hlăm yang ƀuôn, mơ̆ng mlan êgao truh kơ ară anei, dŭm dhar bruă djŏ tuôm ktuh êyuh leh jih ai tiê tui duah, čuăl krĭng, lehanăn mă mkă dlăng kman hŏng mnuih đing. Bruă rơ̆ng kơ klei hdĭp dŭm gŏ êsei lĕ hlăm wăl anôk kwang dar ăt mâo ngă hŏng klei jăk mơh./.