VOV4.Êđê- Tui si Anôk kiă kriê bruă mdrơ̆ng hŏng klei ruă tưp covid 19 čar Daklak, lŏ ƀuh mnuih mâo kman jing TVX kkiêng thŭn 1976 dôk ti alŭ mrô 5, să Čư̆ Môt, kdriêk Ea Hleo, čar Daklak, ñu jing mnuih mă bruă êngiê ti alŭ wăl sang mnia Bình Điền, ƀuôn prŏng Hồ Chí Minh, wĭt kơ ƀuôn sang. Hrue 4/7 ñu đĭ êdeh mdiăng tue wĭt kơ Daklak, êjai ktuê êlan wĭt ñu truă čhiăm guôm ƀô̆, amâo mâo bi mjĕ hŏng mnuih hlăm êdeh ôh. Aguah 5/7 leh trŭn mơ̆ng êdeh ti km92 êlan dơ̆ng prŏng mrô 14, ñu čŏng đĭ êdeh p’phŭt nao kơ sang êa drao să Čư̆ Môt hưn klei suaih pral ñu, lehanăn wĭt kơ hma ti alŭ mrô 5, kbưi hŏng sang, lehanăn amâo mâo bi tuôm hŏng sa čô mnuih ôh. Truh hrue 6/7 ñu mâo klei êngoh êdu, bhañ, kbiă êa adŭng lehanăn iêu blŭ hŏng sang êa drao să, lehanăn mâo klei kčĕ brei nao truh kơ sang êa drao kdriêk mkă dlăng. leh mkă dlăng test pral, snăn ƀuh ñu mâo kman sar Cov 2. leh kơ anăn, hlŏng ngă klei mkă dlăng kman hŏng RT –PCR ăt mâo boh tŭ jing mâo kman Sar Cov 2./.

Pô mblang: Y-Khem Niê