VOV4.Êđê- Êbeh 1.800 čô hđeh hriăm hră gưl 2 ti Daklak mrâo ngă leh hră mơar mprăp kơ klei bi lông hrŏng mŭt hlăm adŭ 10, thŭn hriăm 2021 – 2022 mơ̆ng dua boh sang hră truăn kơ bruă bi hriăm hđeh hriăm hră thâo: Jing sang hră gưl 3 truăn bi hriăm hđeh thâo Nguyễn Du, lehanăn sang hră gưl 3 rông ba hđeh mnuih djuê ƀiă Nơ Trang Lơng. Klei bi lông mŭt hriăm adŭ 10 thŭn anei ti Daklak mâo dua boh sang hră dưi mkŏ mjing klei bi lông hrŏng ruah, anăn jing sang hră gưl 3 Truăn bi hriăm hđeh thâo Nguyễn Du, ƀuôn prŏng Ƀuôn Ama Thuôt, lehanăn sang hră gưl 3 rông ba hđeh mnuih djuê ƀiă Nơ Trang Lơng.

Hlăm ênoh 1.839 čô hđeh ngă hră mơar bi lông, dua boh sang hră anei knŏng hrŏng mă hlăm brô 550 čô hđeh. Êngao kơ dua boh sang hră brei klei dưi bi lông, thŭn anei, dŭm boh sang hră gưl 3 mkăn ti Daklak bi mkŏ mjing hrŏng ruah amâo mâo bi lông ôh. Dŭm boh sang hră gưl 3, lehanăn sang hră lu gưl êngao knŭk kna, sang hră knŭk kna čiêm rông hđeh mnuih djuê ƀiă Tây Nguyên, lehanăn sang hră gưl 3 Cao Nguyên, mâo mkŏ mjing leh hdră hrŏng ruah hjăn, mkă tĭng hlue hdră hrŏng ruah mâo leh knơ̆ng bruă sang čư̆ êa čar Daklak bi mklă./.

Pô mblang: Y-Khem Niê