VOV4.Êđê- Mbĭt hŏng lu alŭ wăl mkăn hlăm ala čar, čar Dak Lak dôk gĭr ktưn bi hmar bruă tlŏ mgang vaccine gang mkhư̆ klei ruă tưp Covid-19 êjai klei ruă tưp hlăm alŭ wăl dôk dleh dưi ksiêm dlăng. Boh nĭk bruă tlŏ mgang dok dưi mđĭ hĭn hlăm dŭm alŭ, ƀuôn mnuih djuê ƀiă, jing krĭng dôk mâo lu klei kpăk hlăm bruă gang mkhư̆ klei ruă tưp leh anăn mâo lu êpul êya mnuih ruă hlăm yang ƀuôn. Phung ngă bruă klei mrâo mơ̆ng sang mđung asăp blŭ Việt Nam krĭng Lăn Dăp Kngư čih hưn kơ klei gĭr ktưn tlŏ mgang vaccine ti să tiah kbưi Ea Ñuôl, kdriêk Ƀuôn Đon, čar Dak Lak.

Mrâo leh tlŏ aruăt tal 2, vaccine gang mkhư̆ klei ruă tưp Covid 19, Y-Dhuen Ƀuôn Krông, dôk ti ƀuôn Êa Mdhar, să Êa Ñuôl, kdriêk Ƀuôn Đon, čar Daklak hŏng klei mơak yăl dliê, anei jing gưl tlŏ vaccine tal 4 mâo mkŏ mjing kơ ƀuôn. Truh kơ ară anei, jih jang mnuih prŏng hlăm ƀuôn mâo tlŏ leh sơăi vaccine, mơ̆ng ară anei klei dôk hyưt kơ klei ruă tưp Covid 19 êdu hĭn leh, jih jang mnuih hưĭt mơh kơ klei duah ƀơ̆ng:

“Leh tlŏ vaccine, mơ̆ng hrue mbrue truh kơ hrue anei, kâo ƀuh hlăm asei mlei ăt suaih, amâo mâo klei ruă ôh, kâo ƀuh hơĭt ai tiê, amâo mâo klei lŏ huĭ ôh. Kâo mâo klei lač jăk kơ Đảng, knŭk kna mđing leh, mjing djăp klei găl kơ jih jang phung ƀuôn sang mâo tlŏ vaccine, kâo ăt čang hmăng mơĭt truh hŏng phung ƀuôn sang bi nao tlŏ vaccine bĕ, tlŏ čiăng dưi mgang kơ asei mlei pô, amâo mâo klei jŭ jhat ôh”.

H’Pôly Êban, k’iăng khua ƀuôn Akŏ Đŭng B, să Êa Ñuôl, kdriêk Ƀuôn Đon, brei thâo, leh 4 gưl bruă sang čư̆ êa, lehanăn dhar bruă mdrao mgŭn mkŏ mjing bruă tlŏ mgang hlăm ƀuôn sang, dưi đru leh kơ jih jang 700 čô mnuih mơ̆ng 18 thŭn kơ dlông mâo tlŏ mgang vaccine sơăi. Mơ̆ng anăn H’Pôly, ba akŏ phung ƀuôn sang dôk bi hyưt, dôk bi huĭ kơ klei tlŏ mgang, lehanăn dhar bruă sang čư̆ êa, bruă mdrao mgŭn jih ai tiê mtrŭt mjhar, đru kơ phung ƀuôn sang thâo săng hĭn kơ klei tŭ dưn mơ̆ng bruă tlŏ vaccine. Mơ̆ng anăn, leh mâo dŭm gưl hriê bi tlŏ mgang êdei snăn phung ƀuôn sang bi jih ai tiê nao tlŏ sơăi:

“Phung ƀuôn sang hlăm dŭm boh ƀuôn bŏ hŏng klei mơak leh mâo hrue dăp bi nao tlŏ vaccine, jih jang mnuih bi mơak, mâo leh mmông dăp brei kơ phung ƀuôn sang nao tlŏ sơăi, boh nik phung mơ̆ng 18 thŭn kơ dlông. Ară anei hlăm ƀuôn mâo tlŏ mgang păt čiăng ênŭm leh jih, năng ai knŏng adôk mă mil 15% ka tlŏ ôh kyua đa đa mnuih dôk yua êa drao lehanăn mâo klei ruă mkăn”.

            Kiă kriê hlăm sa klei dôk tlŏ vaccine gang mkhư̆ klei ruă tưp Covid 19 hlăm dŭm boh ƀuôn, aduôn Phùng Thị Tý, K’iăng khua sang êa drao să Êa Êñuôl, kdriêk Ƀuôn Đon brei thâo, êlâo anăn sang êa drao bi mguôp leh kjăp hŏng bruă sang čư̆ êa să, êpul kiă kriê ƀuôn čih anăn phung dưi tlŏ, lehanăn hưn kơ jih jang mnuih thâo kơ mmông nai bi tlŏ mgang. Wưng anei hlăk hlăm yan hrui wiă lehanăn pĕ boh kphê, snăn mkŏ mjing klei tlŏ mgang dưi ngă hŏng klei pral čiăng kơ bruă phung ƀuôn sang amâo mâo dleh kpăk ôh, kreh ƀuh grăp boh ƀuôn gĭr mkŏ mjing tlŏ mgang bi leh hlăm sa hrue mtam:

“Boh nik hlăm yan hrui êmiêt boh mnga anei, phung ƀuôn sang hnĭng kơ bruă, čiăng mâo tlŏ mgang bi pral lehanăn nao mă bruă. Hdră mă bruă hmei hmei gĭr bi mbha čiăng si wĕ ngă mkŏ mjing klei tlŏ mgng êngao kơ mmông phung ƀuôn sang ngă bruă jing lu hĭn. Tôhmô hlăm aguah tlŏ truh kơ 12h, tal tlŏ truh 6h”.

Trịnh Quang Tấn, Khua să Êa Êñuôl, kdriêk Ƀuôn Đon rei thâo, să mâo êbeh 13 êbâo čô mnuih, hlăm brô 3 êbâo 800 čô mnuih mơ̆ng 18 thŭn kơ dlông, hnơ̆ng ênoh mnuih djuê ƀiă truh kơ mkrah. Bruă sang čư̆ êa să mơak hlăm wưng giăm anei hnơ̆ng vaccine gang mkhư̆ klei ruă tưp mâo mbha leh lu, hmao tlŏ mgang leh pral. Ară anei hlăk ti gưl tal 4 leh, lehanăn êdei kơ gưl anei, srăng ênŭm yơh jih jang mnuih mơ̆ng 18h kơ dlông hlăm să mâo tlŏ vaccine. Tui si Tấn, čiăng kơ grăp blư̆ tlŏ mgang hlăm ƀuôn sang dưi mâo klei êđăp ênan lehanăn dưi rơ̆ng djŏ hŏng hdră êlan gang mkhư̆ klei ruă tưp, să tiŏ nao leh jih jang bruă kđi čar đru bi hâo hưn, mtô mblang, mtrŭt mjhar, lehanăn mtă mtăn kơ jih jang mnuih nao bi tlŏ mgang djŏ mmông, răng dôk bi kbưi, hlue ngă djŏ 5 mta klei mtă:

“Êpul khua kiă kriê sang să, Êpul khua kiă kriê kdriêk mâo klei mđing êdi, kiă kriê hŏng klei kjăp, lehanăn pral truh hŏng dŭm boh ƀuôn, mtô mblang kčĕ đru hŏng klei yuăn êjai, lehanăn wăt klei Êđê mơh, truh hŏng grăp gŏ sang hmei mbha hră mtă mtăn čiăng kơ grăp gŏ sang bi hlue gưt kjăp bruă gang mkhư̆ klei ruă tưp”./.

Pô mblang: Y-Khem Niê