VOV4.Êđê- Hŏng lu alŭ wăl hlăm kluôm ala, klei ruă Covid-19 dôk hmaĭ amâo jăk kơ dŭm bruă duh mkra, ala ƀuôn ti čar Dak Lak. Čiăng dưi mdrơ̆ng hŏng klei ruă tưp, mđĭ klei tŭ dưn duh mkra, mnia blei ăt msĕ mơh dŭm bruă knŭk kna, mnuih ƀuôn sang, anôk bruă mnia blei leh anăn bruă sang čư̆ êa čar dôk mđĭ ktang ba yua kdrăp mrâo hâo hưn, mđing truh hdră mrô. Hŏng bruă bi mlih tal êlâo ba klei tŭ dưn jăk djŏ si ai tiê hluê ngă hdră kñăm mdua, mdrơ̆ng hŏng klei ruă tưp êjai, mđĭ kyar bruă duh mkra, ala ƀuôn êjai.

Knơ̆ng bruă êdeh dŭ mdiăng An Phước jing sa hlăm phung duh mkra ngă bruă dŭ mdiăng tue prŏng êdi ti ƀuôn prŏng Ƀuôn Ama Thuôt, čar Daklak mâo truh 89 boh êdeh, truăn kơ bruă dŭ mdiăng boh mnga bru lŏ hma nao truh kơ dŭm boh čar lehanăn čhĭ kơ ala tač êngao. Phạm Đông Thanh, Khua knơ̆ng bruă brei thâo, klei ruă tưp mơ̆ng akŏ thŭn 2020 truh kơ ară anei hmăi amâo mâo jăk prŏng êdi hŏng bruă knuă hlăm knơ̆ng bruă. Dŭm thŭn êlâo kơ mâo klei ruă tưp, kah knar grăp thŭn knơ̆ng bruă mâo dŭ mdiăng hlăm brô 300 êbâo tôn boh mnga, ƀiădah ară anei hnơ̆ng boh mnga hrŏ leh 20%, hlue anăn mnga mâo ba wĭt hrŏ mơh. Kñăm čiăng thâo mdrơ̆ng hŏng klei ruă tưp, knơ̆ng bruă čŏng ba yua hdră mă bruă hŏng kdrăp mrô čiăng tui duah pô kăp blei, bi mnia mblei, bi kuôl kă, lehanăn kiă kriê, gĭt gai bruă knuă bi mâo klei tŭ dưn hĭn:

“Mă bruă hŏng kdrăp mrô jing hdră mă bruă jăk hĭn kñăm čiăng mâo klei tŭ dưn kơ klei duh mkra mnia mblei mơ̆ng anôk bruă, boh nik êjai dôk găn klei ruă tưp msĕ si ară anei. Hŏng dŭm êpul êya, jih jang klei bi kuôl kă, amâodah ya mta bruă bi mnia mblei dưi mă hŏng email, tơl wăt klei bi klă bruă mnia mblei, ngă hră mơar hŏng email sơăi. Bi prăk mơĭt hlue êlan internet banking. Wăt hlăm bruă kiă kriê, gĭt gai bruă knuă ba yua internet, sitôhmô hlăk hla pŏk yang ƀuôn thâodah phần mềm čih hjăn kơ anôk duh mkra. Ngă bruă msĕ snei jing đru bi hrŏ mơh klei bi mtuôm klă anăp hdơ̆ng mnuih”.

Ba yua kdrăp hâo hưn, mđing truh kơ hdră yua mrô hlăk mâo lu anôk bruă mnia blei leh anăn dŭm gưl bruă sang čư̆ êa čar Dak Lak gĭr pŏk ngă

Lương Văn Minh, K’iăng khua êpul hgŭm puhng duh mkra čar Daklak brei thâo, kluôm čar mâo giăm 18 êbâo phung duh mkra. Klei ruă tưp Covid 19 hmăi leh amâo mâo jăk êdi kơ bruă knuă phung duh mkra, lehanăn bruă ba yua kdrăp mă bruă mrô dưi yap jing hdră êlan mă bruă jăk čiăng kơ phung duh mkra dưi lŏ ngă bruă, mđĭ kyar bruă knuă hlăm boh klei msĕ si ară anei. Lu phung duh mkra hlăm čar ăt čŏng bi mlih hdră mă bruă, lehanăn phŭn tal êlâo dơ̆ng mâo klei tŭ dưn. Tĭng kơ êpul hgŭm ăt hlăk hŏng jih ai tiê mkŏ mjing bruă mkŏ hŏng dŭm anôk bruă pioh bi đru hdơ̆ng găp:

“Êpul hgŭm phung duh mkra čar ăt hlăk mkŏ mjing anôk bi mguôp dŭm phung duh mkra. Hdră mă bruă kơ anăp mâo klei mkŏ hŏng kdrăp mrô sơăi hŏng dŭm anôk bruă duh mkra. Mơ̆ng anăn, phung duh mkra bi čhĭ mnia hŏng êlan online, lehanăn tui duah anôk bi mnia mblei hŏng kdrăp mrô êjai dôk găn klei ruă tưp msĕ snei”.

Mđrăm mbĭt hŏng phung ƀuôn sang, phung duh mkra êjai dôk găn klei ruă tưp dleh dưi ksiêm dlăng, djăp êpul bru, dŭm gưl ti čar Daklak ăt hlăk ba yua hdră mă bruă hŏng kdrăp mrô. Ngô Việt Hồng, k’iăng khua Anôk bruă rĭng jia čar Daklak brei thâo, dŭm boh tal êlâo mă bruă ƀuh dơ̆ng mâo klei tŭ dưn. Ară anei jih jang phung duh mkra hlăm alŭ wăl ngă leh klei hưn lehanăn ba jao jia hŏng êlan internet. Čar hlăk lŏ mđĭ hĭn bruă ba yua hdră anei hlăm klei hrui jia, lehanăn prăk tăk bruă lăn ala, bruă êdeh êdâo:

“Mơ̆ng leh ba yua hdră mă bruă hŏng email, ngă bruă klă mngač hŏng hdra mrô, snăn đru mdrơ̆ng hŏng klei ruă tưp êjai, lehanăn đru bi hrŏ mơh klei amâo mâo myun kơ mnuih nao tuh tia, lehanăn mnuih ngă bruă rĭng jia. Tal dua, kơ mgi dih, bruă ngă anei hŏng klei klă mngač kơ jih klei hrui, ênoh ba jao, mjing sa yang ƀuôn mă bruă hŏng kdrăp mrô msĕ snăn sĭt nik srăng jing jăk hĭn”.

Nguyễn Tuấn Hà, k’iăng khua knơ̆ng bruă sang čư̆ êa čar Daklak brei thâo, êjai klei ruă tưp dleh dưi ksiêm dlăng, ngă bruă kdrăp mrô hlăm alŭ jing bruă năng ngă mtam. Mlan 3/2021, bruă Đảng čar Daklak bi klă leh hdră mtrŭn kơ klei bi mlih hŏng kdrăp mrô, gĭr bi mlih mtam čiăng bi mâo klei mđĭ kyar jăk bruă duh mkra ala ƀuôn hlăm čar:

“Čuăn ruah klă bruă ba yua kdrăp mrô jing yuôm bhăn kơ klei bi mlih hdră ngă bruă ară anei, jing leh wưng myun kơ Daklak pai mă, tui tiŏ bi hmao lehanăn dưi thâo dưn yua hŏng klei jăk jih jang hdră mă bruă hŏng kdrăp mrô hŏng djăp mta hlăm klei hdĭp mda ala ƀuôn. Anôk bruă kiă kriê bruyă Đảng čar, knơ̆ng bruă sang čư̆ êa čar kut kat mơh čuăn ruah hdră mă bruă anei čiăng dưi mâo klei bi mlih kluôm jih jang bruă kiă kriê hlăm klei duh mkra, lehanăn klei hdĭp mda ala ƀuôn hlăm alŭ wăl”.

Klei ruă tưp Covid 19, hlăk hmăi amâo mâo jăk hŏng klei hdĭp mda ala ƀuôn. Ƀiădah bruă ba yua kdrăp mrô, anăp truh kơ klei bi mlih prŏng amâo mâo dưi tlaih ôh, lehanăn čar Daklak hlăk dôk ngă hŏng klei čŏng čiăng, jih ai tiê pô kñăm bi leh jăk bruă ngă mdua, mdrơ̆ng hŏng klei ruă tưp êjai, lehanăn mđĭ kyar bruă duh mkra, lehanăn klei hdĭp mda ala ƀuôn êjai./.

Pô mblang: Y-Khem Niê