VOV4.Êđê - Kñăm đru kơ phung ƀuôn sang mơ̆ng ƀuôn prŏng Hồ Chí Minh mâo leh čar Daklak drông wĭt hlăm mlan hrue mbrue (10/8) Êpul êdam êra dŭm anôk bruă, lehanăn phung duh mkra čar Daklak mkŏ mjing leh hdră “Sang pui mlam mơ̆ng hlăk ai” pioh tŭk knă truh 500 hnư huă ƀơ̆ng amâo mâo mă prăk ôh kơ mnuih wĭt mơ̆ng krĭng mâo klei ruă tưp. Hlăm grăp hnư anăn mâo bur klang jơ̆ng ŭn, êa ksâo ktơr, lehanăn giêt êa mnăm. Jih jang bur ƀơ̆ng anăn srăng dưm hlăm tŏ, pioh hlơr hlăm huôm soop, lehanăn ba truh kơ anôk bi klin mnuih wĭt mơ̆ng krĭng mâo klei ruă tưp ti sang hră knŭk kna čiêm rông hđeh mnuih djuê ƀiă Nơ Trang Lơng čar Daklak.

Mlam mlei, mâo leh 345 čô mnuih mâo wĭt lu jing phung mduôn, hđeh điêt, phung mniê ba tian, phung mniê dôk rông anak điêt kgŭ 1 thŭn mkrah; mnuih nao mkă dlăng klei suaih pral, nao čuă găp djuê, mnuih nao ngă bruă dôk kpăk đuôm ka mâo wĭt; mnuih dưi dưn hdră êlan yang ƀuôn đru ba, găp djuê nao mbĭt hŏng hđeh kgŭ 10 thŭn, mnuih ruă duam... mâo klei čiăng wĭt kơ ƀuôn sang pô. Jih jang mnuih wĭt anei mâo mkă dlăng test pral tơdah amâo mâo ƀuh kman ôh srăng ba bi ktlah sa anôk ti alŭ wăl ƀuôn sang pô hlăm 14 hruê, lehanăn lŏ dơ̆ng ktuê ksiêm hlăm brô 7 hrue ti sang pô. Bi tơdah hlei pô mâo kman srăng ba mdrao mgŭn ti anôk mdrao mgŭn čar./.

Ăt hlăm hruê 10/8, hdră đru kơ mnuih knap mñai “Gưl êdeh klei khăp” ba leh mnơ̆ng dhơ̆ng đru kơ mnuih ƀuôn sang ti krĭng bi ktlah ti să knông lăn Ia Rvê, kdriêk Êa Sup, čar Dak Lak. Hdră anei mâo Êpul hgŭm phung mniê lĭng kahan răng mgang knông lăn čar bi hgŭm hŏng êpul đru Thiện Tâm 47 mbĭt hŏng dŭm phung đru mkăn pŏk ngă. Ti să Ia Rvê, êpul ba leh 30 hnư mnơ̆ng kơ gŏ êsei dleh dlan ti alŭ 8 dôk hluê ngă hdră bi ktlah ti sang. Grăp hnư mnơ̆ng mâo: 5kg braih, 1 huôm ƀung hdang krô, êa praĭ, êa msĭn, bột ngọt, ƀêñ mi, chả giò lehanăn 100 êbâo prăk. Dŭm hnư mnơ̆ng anei mâo pô bi ala alŭ tŭ mă lehanăn nao ba kơ dŭm gŏ êsei dleh dlan. Mbĭt anăn, êpul lŏ đru 500 kg dham mtam kơ mnuih ƀuôn sang, mđup brei 500 giêt êa lehanăn 100 ală kĭng gang kơ phung knuă druh, lĭng kahan dôk mă bruă ti anôk gak răng./.

Y Khem; H Nêc pô mblang