VOV4.Êđê- Čar Dak Lak ară anei mâo êbeh 209 êbâo ha kphê, hnơ̆ng mâo grăp thŭn êbeh 500 êbâo ton, jing phŭn hrui wĭt mơ̆ng dŭm êtuh êbâo čô ƀĭng ngă lŏ hma. Čiăng gang mkhư̆ klei tlĕ dăp, rơ̆ng êđăp ênang ngăn drăp kơ phung pla kphê, dŭm anôk bruă djŏ tuôm leh anăn êpul čŏng kriê dlăng alŭ ƀuôn ti čar dôk gĭr ktưn pŏk ngă dŭm hdră gak răng.

Hlăm 3 mlan/hrue kăm leh huă ƀơ̆nbg tlam, Trương Văn Đệ, dôk ti alŭ mrô 3, să Êa Kpam, kdriêk Čư̆ Mgar lŏ mprăp ao kpal, hdruôm jơ̆ng ƀôt, đuôn lehanăn pui pit... mbĭt hŏng ayŏng adei hlăm êpul čŏng kiă kriê ƀuôn sang lŏ hiu suang, čiăng răng kriê đang kphê. Đệ yăl dliê, đang kphê gŏ sang pô ti knhal tuič alŭ mrô 3, kbưi hŏng anôk ƀuôn sang dôk snăk, snăn ênưih snăk lĕ hlăm klei arăng tlĕ dăp. Kyuanăn, mơ̆ng akŏ mlan 10 leh, tơdah boh kphê hlăk hlê dơ̆ng khua, êpul čŏng kiă kriê ƀuôn sang bi hiu suang dlăng gak răng yơh:

"Thŭn sang hmei tuôm hŏng phung knĕ tlĕ pĕ truh 40 phŭn kphê, năng ai êbeh mơh kơ 20 klŭng boh mtah. Huĭ kơ klei luič arăng tlĕ, gŏ sang mưn mnuih hrui pĕ mơ̆ng hnưm, ƀiădah boh kphê ka jăk ksă ôh snăn klei tŭ dưn boh kphê amâo mâo lu ôh. Phung knĕ tlĕ pĕ diñu đăk mbĭt hŏng adhan, diñu yua wăt ktrei khăt jih adhan, čiăng ba mđuĕ, snăn kơ yan êdei amâo lŏ mâo adhan mboh ôh. Thŭn anei mâo phung ayŏng adei hlăm êpul čŏng kiă kriê mă pô bi gak răng, snăn kăn lŏ tuôm rei hŏng phung knĕ hiu tlĕ, sang hmei lui boh kphê ksă djŏk kơh pĕ".

Čar Dak Lak ară anei mâo êbeh 209 êbâo ha kphê, hnơ̆ng boh mnga grăp thŭn đaŏ tĭng êbeh 500 êbâo ton

Kluôm să Êa Kpam mâo êbeh 1.200 ha kphê, lă liă truh hŏng kdriêl lăn ƀuôn prŏng Ƀuôn Ama Thuôt, lehanăn wăl krah Ƀuôn Hô. Thiếu tá Lưu Quang Chiến – Khua kiă kriê kahan ksiêm să Êa Kpam, kdriêk Čư̆ Mgar brei thâo, hlăm dŭm ênha kphê hlăm wăl bi kdriêl anăn, phung knĕ ênưih mčua nao bi tlĕ, ngă luič klei êđăp ênang, luič liê ngăn dŏ phung ƀuôn sang. Thŭn anei, kahan ksiêm să bi hgŭm leh hŏng dŭm dhar bruă, êpul êya mkŏ mjing mâo 8 êpul čŏng kiă kriê mă pô ti dŭm boh alŭ, ƀuôn, ngă klei hiu gak răng, snăn kphê phung ƀuôn sang ăt hrông mơh:

“Kahan ksiêm să mtrŭn leh hdră mă bruă, truh kơ grăp êpul čŏng kiă kriê mă pô, lehanăn dŭm êpul ba anăp pioh hiu ksiêm êjai mlam mmăt hlăm dŭm boh hma anôk êbhiông mnuih, jing anôk kreh tuôm nanao hŏng phung knĕ tlĕ dăp hlăm anăn. Lehanăn mkŏ mjing klei kăp bi hưn hdơ̆ng găp hŏng zalo, facebook mơ̆n să, kdriêk kơ hdră, mnêč phung knĕ kreh hiu tlĕ, brei phung ƀuôn sang mâo klei răng. Ksiêm dlăng jih jang phung mrâo wĭt mơ̆ng mnă, phung knĕ kreh hiu tlĕ, čiăng mâo hdră êlan mjuăt bi hriăm, ngă klei bi mhuĭ, mơ̆ng anăn diñu amâo jhŏng lŏ ngă soh ôh”.

Čar Dak Lak ară anei mâo êbeh 209 êbâo ha kphê, hnơ̆ng boh mnga grăp thŭn đaŏ tĭng êbeh 500 êbâo ton

Čar Daklak ară anei mâo leh êbeh 209 êbâo ha kphê, hnơ̆ng boh kphê mâo êbeh 500 êbâo tôn, snăn hlăm grăp blư̆ truh yan boh kphê ksă, nao hlăm klei hrui êmiêt, jih jang mnuih čiăng snăk mâo klei dưi răng kriê kphê pô bi jăk. Tui si Thượng tá Nguyễn Văn Quý - K'iăng khua adŭ bruă kahan ksiêm phung ngă soh jhat čar Daklak, mbĭt hŏng dŭm êpul čŏng kiă kriê mă pô ti ƀuôn sang, kahan ksiêm čar mâo leh dŭm hdră mă bruă, kñăm kăm mkhư̆ jih phung knĕ kreh tlĕ dăp, lehanăn ƀư̆ mkra phung hiu duah blei amâo mâo hŏng klei ênuah, rơ̆ng čiăng dưi mâo klei êđăp ênang hlăm alŭ wăl:

"Adŭ bruă kahan ksiêm phung ngă soh jhat čar tiŏ nao leh êpul kahan ksiêm hiu suăng truh hlăm dŭm alŭ wăl kreh tuôm hŏng klei tlĕ dăp, čiăng bi mguôp hŏng êpul kahan ksiêm dŭm kdriêk, wăl krah, ƀuôn prŏng mkŏ mjing klei hiu gak răng, gang mkhư̆, mă kơ̆ng êpul phung knĕ kreh tlĕ dăp boh kphê phung ƀuôn sang. Mkŏ mjing hdră mjuăt bi hriăm čiăng kơ phung ƀuôn sang mâo klei thâo kiă kriê ngăn dŏ pô, lehanăn mđrăm mbĭt kăp iêp ksiêm phung kreh ngă klei tlĕ dăp nĕ niêu, lehanăn mtă mơh kơ phung hiu blei boh kphê, amâo mâo dưi duah blei ôh boh kphê mơ̆ng phung hiu duah čhĭ amâo mâo thâo bĭt phŭn agha”./.

Pô mblang: Y-Khem Niê