VOV4.Êđê - Tui si anôk kiă kriê bruă mdrơ̆ng hŏng klei ruă tưp Covid 19 čar Daklak, hlăm hrue mbrue (1/11), čar mâo čih yap ênoh mnuih djŏ klei ruă tưp truh 244 čô ti 12 boh kdriêk, wăl krah, ƀuôn prŏng hlăm anăn mâo truh 67 čô bi mtưp hlăm yang ƀuôn. Ƀuôn prŏng Ƀuôn Ama Thuôt mâo 72 čô djŏ mrâo, hlăm anăn mâo truh 32 čô hlăm yang ƀuôn.

Wăl krah Ƀuôn Hô, kdriêk Krông Ƀŭk, lehanăn kdriêk krông Ana ăt jing 3 alŭ wăl mâo ênoh mnuih tưp lu hĭn. Yap truh kơ hrue mbrue, čar Daklak mâo leh 4 êbâo 294 čô mnuih ruă covid 19, hlăm anăn mâo leh 2 êbâo 160 čô mnuih mdrao hlao leh. Knŏng yap hlăm 10 hrue giăm anei, kluôm čar mâo leh 1 êbâo 366 čô mnuih ruă, hlăm anăn mâo 704 čô mnuih tưp hlăm yang ƀuôn./.

Y Khem pô mblang