VOV4.Êđê – Phung pla boh suai ti kdriêk Dak Mil, čar Dak Nông dôk amâo hơĭt pĭt amâo mđao kyua dŭm êtuh ha xoai truh yan hrui pĕ ƀiădah amâo mâo mnuih blei. Hŏng đang hrui êmiêt leh, mâo leh dŭm êtuh ton boh soai tuh hwiê.

Phạm Công Văn ti alŭ Tân Lập, să Dak Găn mâo giăm 2 ha lăn pla boh suai pioh čhĭ kơ ala tač êngao. Thŭn dih, mơ̆ng war anei gŏ sang ñu mâo mnga êbeh 200 êklăk prăk. Bi thŭn anei, mơ̆ng akŏ yan truh kơ ară anei gŏ sang ñu knŏng mâo čhĭ mă giăm 100 êklăk prăk, knŏng djăp prăk pioh tla prăk blei hbâo pruê, amâo lŏ mâo mnga ôh. Dŭm adôk ba tuh jih amâo mâo mnuih blei ôh.“Čhĭ ară anei êlưih êdi, amâo mâo yuôm ôh, dơ̆ng mơ̆ng phŭn kâo pla ana boh suai truh kơ ară anei. Boh suai pioh čhĭ kơ ala tač êngao mâo čhĭ mă mơ̆ng 3 êbâo truh 3 êbâo 500 prăk/kg. Bi dah čhĭ kơ sang mnia knŏng bi blei mă mil 500 prăk/kg, snăn boh suai mboh hlăm 3 yan amâo mâo mnuih blei, snăn knŏng tuh hwiê hĕ hơăi. Hlei sang mâo boh suai mboh amâo mâo siam ôh čhĭ knŏng mil 500 prăk/kg, tĭng wĭt nao kăn lŏ djăp leh prăk pĕ. Lu sang lui boh ksă hlăm ana lehanăn luh, amâodah ară anei knŏng lŏ nao khăt mkra adhan boh lui boh luh jih hlăm phŭn bi mbrŭ dŭm anăn đuič yơh”.

Msĕ snăn mơh, gŏ sang aduôn Lê Thị Tư, mâo êbeh 1,2ha đang boh suai ăt kăn mâo anôk čhĭ, ngă kơ gŏ sang ñu luh liê êdi mơ̆ng klei mă bruă knuă. Čhĭ hlăm 100kg boh ka djăp mơh prăk tla ai mưn mnuih hrui pĕ boh. Khădah jing luič liê êdi, ƀiădah gŏ sang ăt nao čan prăk pioh lŏ mjut mjing war boh:“Sang kâo ară anei mâo hlăm brô mơ̆ng 5 – 6 tôn boh ƀiădah amâo mâo thâo bĭt anôk čhĭ ôh, amâo mâo mnuih blei ôh. War boh suai anei, kâo duh bi liê sa thŭn jih hlăm brô 70 êklăk prăk, ƀiădah ăt lŏ dơ̆ng dlăng kriê, prue hbâo, krih êa drao bi djăp ênŭm čiăng kơ ana suai mâo ai dưi lŏ mboh kơ thŭn êdei. Klei kơ ênoh ênil thŭn anei, lŏ tuôm hĕ hŏng klei ruă tưp mơh, snăn amâo mâo êlan čhĭ ôh boh suai, mâo sang kăn lŏ djăp rei tla prăk duh bi liê”.

Tui si klei ksiêm yap ti să Dak Găn, ară anei hlăm kluôm să mâo hlăm brô 1 êbâo ha đang boh suai djăp mta. Hlăm anăn, mâo hlăm brô 700ha hlăk mboh, kah knar mâo 15 – 20 tôn/ha/yan. Đỗ Viết Hạnh, k’iăng khua knơ̆ng bruă sang čư̆ êa să Dak Găn brei thâo, kyua hmăi mơ̆ng klei ruă tưp Covid 19, lu pô đang war knŏng mrâo čhĭ mă mkrah hŏng ênoh êlưih măng ai, dŭm adôk hlŏng lui yơh, kyua amâo lŏ mâo mnuih blei ôh, lehanăn lŏ trŭn hĭn:“Lač kơ hdră, snăn să mâo leh klei akâo hŏng dŭm anôk bruă djŏ tuôm iêu mthưr phung duh mkra mâo hdră êlan mkra mjing kơ boh kroh, čiang ƀrư̆ ƀrư̆ ksiêm tĭng mâo hdra duh bi liê. Alŭ wăl mđĭ ai mnuih pla mjing gĭr bi dlăng kriê, djă pioh war boh kơ dŭm thŭn ti anăp. Lehanăn hmei mâo leh klei akâo hŏng dŭm dhar bruă knŭk kna, knơ̆ng prăk mâo hdră êlan lŏ bi kdung nư, amâodah čuăl nư, bi hrŏ prăk mnga čan, čiăng kơ mnuih pla mjing boh suai mdul klei dleh dlan anei”./.