VOV4.Êđê- Hrue mbrue (27/7) čar Daknông mâo 4 čô ti Dak Mĭl jing nai êa drao djŏ klei ruă tưp Covid 19 jing F1 mơ̆ng pô ruă mrô 98494 sơăi. Êlâo anăn digơ̆ tuôm bi tuôm giăm hŏng mnuih ruă lač anăn, lehanăn mâo mă mta ba mkă dlăng kman hŏng RT-PCR snăn mâo kman Sar CoV 2 sơăi hlăk 10h25’ hrue mbrue (27/7). Leh thâo jing djŏ kman leh, snăn knơ̆ng bruă mdrao mgŭn, mbĭt hŏng dŭm êpul bruă djŏ tuôm ngă klei bi ktlah, lehanăn ba mnuih ruă hŏng êdeh dŏng mdrao truh kơ sang êa drao jing jai mrô 1, ti anôk bruă mdrao mgŭn kdriêk Dak Mil. Lehanăn ngă klei bi mdjiê kman jih jang sang mnuih ruă, dŭm anôk mnuih ruă tuôm nao leh jing dŭm anôk ênưih bi mtưm. Êpul bruă djŏ tuôm pral tui duah mnuih jing F1 mâo 42 čô jing phung bi tuôm giăm hŏng mnuih ruă. Ară anei dhar bruă mdrao mgŭn pral lŏ wĭt ksiêm jih jang hrue mmông mă bruă lehanăn anôk đuĕ hiu mơ̆ng phung ruă anăn hlăm wang 14 hrue êgao, lehanăn lŏ dơ̆ng tui duah hŏng phung tuôm bi mtuôm giăm. Truh kơ ară anei čar Daknông mâo leh truh 46 čô mnuih mâo klei ruă tưp Covid 19./.

Pô mblang: Y-Khem Niê