VOV4.Êđê- Knơ̆ng bruă sang čư̆ êa čar Daknông mrâo mtrŭn leh hdră kơ bruă mkŏ mjing dŭm anôk kiă răng, gang mkhư̆ mnuih mŭt Campuchia soh hŏng hdră bhiăn hlăm alŭ wăl čar. Hlue anăn, Knơ̆ng bruă mdrao mgŭn mâo bruă klam kiă kriê, hgŭm mbĭt hŏng dŭm anôk bruă djŏ tuôm duah anôk, mkŏ mjing hdră rŭ mdơ̆ng sang êa drao jing jai pioh mdrơ̆ng hŏng klei ruă tưp Covid 19 tơdah čiăng. Knơ̆ng bruă mdrao mgŭn ktrâo atăt klei mă bruă hưn mthâo klei suaih pral, đru hlăm bruă mdrao mgŭn êjai hlăm klei hiu suang, gak răng hlăm knông lăn, lehanăn hlăm djăp kčŭn êlan mrô 14; 28 hlăm êlan dơ̆ng čar kñăm ksiêm kjăp mnuih, lehanăn êdeh êdâo găn êrô mơ̆ng dŭm čar mkăn mŭt hlăm čar pô. Mbĭt hŏng klei kiă kriê, ktrâo atăt, hlue ngă jăk dŭm klei tlŏ mgang vaccine Covid 19, rơ̆ng čiăng mâo klei êđăp ênang, djŏ mnuih hlue djŏ hŏng mta mtrŭn mơ̆ng phŭn bruă mdrao mgŭn, Knơ̆ng bruă mdrao mgŭn hgŭm hŏng dŭm anôk bruă djŏ tuôm kăp kčĕ kơ knơ̆ng bruă sang čư̆ êa čar đru prăk bi liê, kdrăp mdrao mgŭn, srăng đru kơ čar Mondulkiri ala čar Campuchia hlăm bruă mdrơ̆ng hŏng klei ruă tưp covid 19./.

Pô mblang: Y-Khem Niê