VOV4.Êdê- Leh Phŭn bruă Sang hră m’ar mtô bi hriăm hưn mthâo puăng klei bi lông gưl 3 thŭn 2021, dŭm boh sang hră gưl prŏng mphŭn hưn mthâo puăng hrŏng ruah hđeh mŭt hriăm. Thŭn anei puăng kah knar hlăm klei bi lông gưl 3 mâo klei bi êdah đĭ ti lu klei bi lông. Mbĭt anăn, dŭm boh sang hră gưl prŏng mđing leh kơ bruă hrŏng ruah hđeh mŭt hriăm hŏng lu hdră msĕ si: Ksiêm dlăng hnơ̆ng hriăm gưl 3, tĭng dlăng klei thâo, ksiêm dlăng puăng klei bi lông… kyua anăn knơ̆ng čuăn bi mklă puăng klei bi lông hriăm jih gưl 3 srăng hrŏ. Kyua anăn, puăng hrŏng ruah hđeh mŭt hriăm gưl prŏng thŭn anei đăo knăl srăng đĭ hĭn mkă hŏng dŭm thŭn êlâo. Hmei mâo leh klei bi blŭ hrăm hŏng K’iăng nai prŏng, nai prĭn Nguyễn Thu Thủy, Khua knơ̆ng ksiêm dlăng kơ bruă mtô bi hriăm gưl prŏng, Phŭn bruă sang hră m’ar mtô bi hriăm kơ klei anei:

-  Ơ Nguyễn Thu Thuỷ! Thŭn anei, lu sang hră gưl prŏng lŏ dơ̆ng bi lu jơr dŭm hdră hrŏng ruah, mă puăng bi lông hriăm jih gưl 3 ăt dưi lač jing puăng lu hĭn thŭn êlâo, si klei anei hmaĭ kơ puăng dưi mŭt hriăm gưl prŏng?

Nai prŏng, nai prĭn Nguyễn Thu Thủy:  Msĕ si klei hâo hưn Phŭn bruă sang hră mtô bi hriăm hưn mdah leh êlâo anăn, puăng bi lông hriăm jih gưl 3 thŭn 2021 đĭ leh hlăm lu klei bi lông. Hlăm anăn, ênoh klei bi lông mâo puăng lu ăt đĭ thiăm lu hlăm klei hriăm msĕ klei blŭ Angle, Ngữ văn, Giáo dục công dân, Sinh học...

 Puăng hrŏng ruah dưi mă mơ̆ng klei tŭ bi lông hriăm jih gưl 3 tinei jing puăng djŏ ruah mơ̆ng dŭm sang hră hlăm lu mta phŭn msĕ si klei tŭ bi lông hriăm jih gưl 3 (puăng mơ̆ng dŭm klei bi lông hriăm jih gưl 3 jing sa hlăm hdră hrŏng ruah), hnơ̆ng kčah hrŏng ruah, ênoh phung bi lông čih anăn hrŏng ruah hlăm sa bruă, sa hdră hriăm mjuăt.

 Puăng kah knar lu, ênoh klei bi lông mâo puăng 8 kơ dlông ăt lu anăn bruă  hrŏng ruah srăng găl ênưih hĭn, dŭm sang hră mâo klei găl hlăm bruă bi mklă rơ̆ng hnơ̆ng jăk mphŭn mŭt hriăm. Êngao kơ bruă puăng dŭm ênoh bi lông  lu hĭn mkă hŏng thŭn 2020, snăn bruă dŭm sang hră pioh leh hnơ̆ng kčah kơ dŭm hdră mdê mdê msĕ si ksiêm dlăng hră čih wưng hriăm, puăng ksiêm dlăng klei thâo, klei bi lông hnơ̆ng quốc tế… anăn ênoh pioh čiăng ksiêm bi mklă puăng bi lông hriăm jih gưl 3  srăng hrŏ sa hnơ̆ng. Anei ăt jing sa mta phŭn yuôm bhăn ngă kơ puăng hrŏng ruah mŭt hriăm sang hră gưl prŏng thŭn anei srăng đĭ hĭn dŭm thŭn êlâo.

Nai prŏng, nai prĭn Nguyễn Thu Thuỷ- Khua hlăm Bruă  bi hriăm gưl prŏng - Phŭn bruă sang hră mtô bi hriăm

-   Phung bi lông lač hnơ̆ng dleh - ênưih bi kpleh plah wah dŭm klei hriăm hlăm dŭm klei hriăm bi lông srăng ngă dleh dlan kơ phung hđeh hlăm bruă bi mlih klei čiăng hriăm, si ih lač kơ klei anei?

Nai prŏng, nai prĭn Nguyễn Thu Thủy:  Klei bhiăn hrŏng ruah ară anei dưi brei phung hđeh dưi mâo klei dưi čih anăn hrŏng ruah amâo kčah ôh ênoh klei čiăng hriă, grăp êpul klei hriăm hlăm sa bruă jing sa klei čiăng hriăm leh. Dŭm sang hră dlăng kơ puăng mơ̆ng dlông truh kơ gŭ čiăng hrŏng ruah, amâo djŏ dlăng hlăm klei čiăng hriăm čiăng hrŏng ruah, êngao kơ phung bi lông sa hnơ̆ng puăng ti knhal tuič hră čih anăn, kyua anăn phung bi lông năng ai čih anăn hrŏng ruah hŏng lu klei hriăm hlăm sa bruă. Kyua anăn brei phung hđeh ruah dŭm klei hriăm mâo klei bi lông pô mâo puăng lu hĭn čiăng hrŏng ruah leh anăn mâo klei găl hĭn. Hŏng bruă ba yua kdrăp hâo hưn mrâo mrang hlăm klei hrŏng ruah hriăm gưl prŏng, gưl krah, phung hđeh mâo lu klei găl, lu blư̆  bi mlih klei čang hmăng hŏng klei djŏ guôp, djŏ klă hĭn mơ̆ng klei tŭ bi lông hriăm jih gưl 3 mơ̆ng pô.

-  Thŭn anei dŭm sang hră gưl prŏng bi lu jơr hdră hrŏng ruah hŏng hnơ̆ng kčah lu hĭn mkă hŏng dŭm thŭn êlâo. Snăn klei anei hmiă mơh hĕ kơ hdră hrŏng ruah hŏng puăng bi lông hriăm jih gưl 3?

Nai prŏng, nai prĭn Nguyễn Thu Thủy:  Hlăm klei êngiê hrŏng ruah ară anei hŏng bruă ƀrư̆ hruê ƀrư̆ mâo lu anôk mjuăt bi hriăm hưn mdah bruă hrŏng ruah hjăn amâodah mkŏ mjing klei bi lông hluê si êpul snăn eneoh hnơ̆ng kčah kơ phung dưi hrŏng ruah hŏng puăng bi lông hriăm jih gưl 3  hrŏ mkă hŏng thŭn êlâo jing djŏ leh, leh anăn dôk hlămhdră pô thâo êlâo leh.

 Hluê si klei ksiêm yap brei ƀuh, thŭn 2021 dŭm sang hră pioh kơ hnơ̆ng kčah kơ dŭm hdră hrŏng ruah mkăn lu hĭn mkă hŏng dŭm thŭn. Khădah, hrŏng ruah hluê hdră mkăn jưh hlăm lu boh phŭn msĕ si hnơ̆ng kčah, ênoh hđeh bi lông čih anăn hrŏng ruah, hnơ̆ng jăk anôk ruah, ênoh hđeh djŏ ruah bi mklă dưi mŭt hriăm… anăn ênoh hrŏng ruah jing 1 ênoh mrô mâo hnơ̆ng kčah. Phung bi lông leh dưi hrŏng ruah hŏng hdră mkăn ƀiădah djŏ ruah leh anăn bi mklă nao hruăm snăn srăng amâo dưi nao hrŏng ruah ôh ti sang hră mkăn leh anăn dŭm hdră mkăn.  Dŭm boh sang hră srăng čih anăn phung bi lông bi mklă mŭt hriăm leh anăn phung anei srăng amâo lŏ nao hrŏng ruah ôh gưl 1 hŏng klei tŭ bi lông hriăm jih gưl 3  leh anăn srăng amâo hmaĭ ôh kơ hnơ̆ng kčah hrŏng ruah mơ̆ng hdră ruah anei hluê si bi lông hriăm jih gưl 3,

- Ya klei ih čiăng mtă kơ phung hđeh čiăng dưi mâo klei tŭ msĕ si klei čang hmăng hlăm yan hrŏng ruah mŭt hriăm sang hră gưl prŏng thŭn anei?

Nai prŏng, nai prĭn Nguyễn Thu Thủy:  Puăng bi lông hriăm jih gưl 3 thŭn anei lu hĭn mkă hŏng thŭn êlao, năng ai đa đa phung hđeh mâo 15, 26 puăng ăt kăn dưi djŏ ruah hriăm gưl prŏng rei tơdah amâo ksiêm bi nik, ksiêm hriăm bi klă sĭt ruah klei čiăng hriăm. Jing phung hđeh amâo dưi ngă ngơi mang ôh hŏng puăng pô mâo leh, ƀiădah kƀĭn hlăm dŭm bruă bi ktưn lu hlăm đa đa sang hră. Sĭt mkra mlih klei čiăng hriă, brei phung bi lông ksiêm dlăng bi klă, amâo djŏ ôh ƀuh puăng pô djăp puăng čuăn mơ̆ng bruă anei thŭn êlâo, čih anăn, ƀiădah amâo lŏ mâo ôh klei ruă mkăn, kyua puăng lu jing dah lu hlăm jih jang, amâo djŏ mdê ôh hŏng ênoh ƀiă phung bi lông. Hŏng phung hđeh jhŏng hŏng ênoh puăng lu snăn brei lŏ mbŏ thiăm klei čiăng hriăm, dưi ruah dŭm bruă pô khăp ƀiădah ti lu sang hră mdê mdê čiăng mđĭ klei dưi djŏ ruah.

-  Bi mni lač jăk kơ Nguyễn Thu Thuỷ- Khua hlăm Bruă  bi hriăm gưl prŏng - Phŭn bruă sang hră mtô bi hriăm kơ klei blŭ hrăm anei.