VOV4.Êđê -  Ti anăp klei dleh ksiêm dlăng mơ̆ng klei ruă tưp Covid-19, tlam mbruê (31/5) bruă sang čư̆ êa čar Lâm Đồng mâo leh hră mtrŭn mjêč kơ bruă srăng ngă kjăp dŭm hdră êlan gang mkhư̆ klei ruă tưp. Bruă sang čư̆ êa čar Lâm Đồng mta kơ dŭm knơ̆ng, dhar, anôk bruă, dŭm êpul êya bruă kđĭ čar yang ƀuôn, bruă sang čư̆ êa dŭm kdriêk, ƀuôn prŏng srăng lŏ ngă dŭm hdră êlan gang mkhư̆ klei ruă tưp Covid-19.

Hlăm anăn, mta kơ jih jang mnuih mrâo wĭt mơ̆ng anôk mâo klei ruă tưp srăng ngă klei bi ktlah 21 hruê mơ̆ng 5 mmông tlam hruê 31/5. Dŭm čô amâo ngă djŏ srăng mâo klei bi kmhal djŏ hŏng hdră bhiăn. Bi kơ dŭm čô mnuih wĭt mơ̆ng dŭm anôk čuăl krĭng, bi kbưi yang ƀuôn ti ƀuôn prŏng Hồ Chí Minh lehanăn dŭm čar Bắc Giang, Bắc Ninh... mơ̆ng hruê 18/5 truh kơ ară anei srăng nao hưn mdah bruă mdrao mgŭn, ksiêm dlăng klei suaih pral lehanăn ƀuăn rơ̆ng amâo kbiă đuê̆ mơ̆ng sang tơdah ka djăp 14 hruê.

Mbĭt hŏng anăn, bruă sang čư̆ êa čar Lâm Đồng gĭt gai brei mdei jih jang bruă dŭ mdiăng tuê mơ̆ng ƀuôn prŏng Hồ Chí Minh wĭt kơ čar Lâm Đồng. Dŭm klei bi kuôl ung mô̆, hdơr hruê kkiêng ăt srăng brei mdei, klei djiê brŭ amâo dưi dôk sa anôk êgao kơ 30 čô sa blư̆ lehanăn srăng ngă djŏ 5 klei bhiăn hlăm bruă gang mkhư̆ klei ruă tưp Covid-19. Hlăm dŭm hruê mmông anei, čar Lâm Đồng kăm ghă dŭm čô knuă druh, mnuih mă bruă knŭk kna srăng kbiă đuê̆ mơ̆ng čar