VOV4.Êđê- Lŏ dơ̆ng hlăm hdră bi kƀĭn tal 57, aguah mbrue (15/6), ti sang bruă kƀĭn ala, Dhar bruă gĭt gai bruă kƀĭn ala mă leh klei blŭ kơ klei hâo mdah ksiêm wĭt klei hlue ngă bruă duh mkra ala ƀuôn lehanăn ngăn prăk knŭk kna 6 mlan akŏ thŭn, lehanăn dŭm hdră kơ bruă duh mkra ala ƀuôn, lehanăn ngăn prăk knŭk kna kơ 6 mlan knhal jih thŭn. Khua bruă kƀĭn ala Vương Đình Huệ kiă kriê klei bi kƀĭn. Ti anôk bi kƀĭn, phung khua êmua hlăm Dhar bruă bi lač: Knŭk kna krơ̆ng bi hơĭt bruă duh mkra kluôm, krơ̆ng kơ klei prăk luič ênoh, lehanăn prăk mnga djul, ênoh ênil hơĭt, klei knŭk kna duh bi liê bi djŏ hŏng mta kñăm, kơ klei duh mkra mnia mblei, mâo klei ksiêm dlăng jăk, snăn kơh tơdah leh jih klei ruă tưp snăn bruă duh mkra ala čar pô pral lŏ krŭ wĭt. Tui si klei hâo mdah 6 mlan leh akŏ thŭn, hnơ̆ng đĭ knyar GDP đăo knăl mâo hlăm brô 5,8%. Mâo ba wĭt kơ ngăn prăk knŭk kna hlăm brô 55,5%, tui si ênoh čoh čuăn, đĭ 10,9% mkă hŏng wưng anei thŭn dih. Êjai klei ruă tưp Covid 19, dŭm ênoh brei ƀuh boh tŭ dưn jăk, siămdah ka djăp ôh hŏng ênoh čuăn tui si hdră kčah. Năng mđing êdi mâo hlăm brô 23% ênoh phung duh mkra bi kdŭn đuĕ, lač kơ klei dưi tŭ mơ̆ng dŭm anôk duh mkra toh hroh leh kyua klei ruă tưp./.

Pô mblang: Y-Khem Niê