VOV4.Êđê - Mđing truh kơ asăp iêu mthưr mơ̆ng Khua gĭt gai Đảng Nguyễn Phú Trọng leh anăn klei gĭt gai mơ̆ng Đảng, Knŭk kna, Knơ̆ng bruă mặt trận čar kwar Việt Nam mrâo hmao đru 1 êklăk 7 êtuh êbâo hnư êsei bi knar hŏng ênoh 51 êklai prăl mơ̆ng ênoh tŭ mă đru gang mkhư̆ klei ruă Covid-19 kñăm đru hŏng dŭm čar, ƀuôn prŏng nah Dhŭng dôk hluê ngă bi ktlah yang ƀuôn hluê si Asăp mtrŭn mrô 16 mơ̆ng Khua Knŭk kna. Ênoh prăk anei srăng đru grăp hnư huă ƀơ̆ng bi knar hŏng 30 êbâo prăk kơ 17 čar, ƀuôn prŏng mâo: Đồng Nai, Cần Thơ, Bình Phước, Tây Ninh, Bà Rịa - Vũng Tàu, Tiền Giang, Long An, Vĩnh Long, Đồng Tháp, Bến Tre, Hậu Giang, An Giang, Bạc Liêu, Sóc Trăng, Trà Vinh, Cà Mau, Kiên Giang. Dŭm hnư êsei anei srăng mâo dŭm čar, ƀuôn prŏng đru kơ phung êdu kƀah, tuôm hŏng dleh dlan kyua bi ktlah yang ƀuôn jing phung amâo dưi dưn ôh hdră đru mâo leh.

H Zawut pô mblang