VOV4.Êđê - Ti anăp klei dleh dưi ktuê dlăng mơ̆ng klei ruă tưp Covid-19, hruê mbruê 29/7, mơ̆ng ênoh prăk hlăm klei bi mguôp, Dhar bruă gưl dlông mặt trận čar kwar Việt Nam duh bi liê 46 êklai prăk đru kơ bruă gang mkhư̆ lehanăn keh vaccine klei ruă tưp Covid-19. Klă klơ̆ng, Dhar bruă gưl dlông mặt trận čar kwar Việt Nam duh bi liê 23 êklai prăk hlăm ênoh prăk bi mguôp mơ̆ng êpul group Panko truh kơ dhar bruă mặt trận ƀuôn prŏng Hồ Chí Minh čiăng đru kơ bruă gang mkhư̆ klei ruă tưp Covid-19 hlăm alŭ wăl ƀuôn prŏng, duh bi liê kơ sang êa drao hđeh gưl dlông hŏng ênoh 1 êklai mkrah lehanăn brei kơ anôk bruă mdrao mgŭn ƀuôn prŏng Thuận An, čar Bình Dương 1 êklai mkrah čiăng blei dŭm mnơ̆ng yua, kdrăp yua hlăm bruă gang mkhư̆ klei ruă tưp Covid-19 lehanăn đru kơ dŭm čô aê mdrao, nao mdrao, mnuih mă bruă mdrao mgŭn dôk nao hgŭm hlăm bruă gang mkhư̆ klei ruă tưp Covid-19. Mbĭt anăn, brei 20 êklai prăk kơ keh vaccine gang mkhư̆ klei ruă tưp Covid-19 mơ̆ng phŭn bruă ngăn prăk ksiêm dlăng. Truh kơ ară anei, dhar bruă mặt trận čar kwar Việt Nam mơĭt leh kơ keh vaccine gang mkhư̆ klei ruă tưp Covid-19 hŏng ênoh prăk truh kơ 1 êbâo 43 êklai prăl.

Y Bel pô mblang