VOV4.Êđê- Hlăm tlam 13-7, brei klei blŭ kơ hdră duh bi liê Hdră kñăm ala čar mkŏ mkra krĭng ƀuôn sang mrâo wưng thŭn 2021-2025, Dhar bruă kƀĭn ala Quốc hội bi tŭ ư bi liê 30 êbâo êklai prăk duh bi liê knŭk kna wưng man dưn kơ hdră pŏk ngă Hdră bruă. Mta mrâo năng mđing mơ̆ng Hdră bruă wưng thŭn 2021-2025, anăn jing: Mkŏ mjing Hnơ̆ng kčah ala čar kơ krĭng ƀuôn sang mrâo dŭm gưl (čar, kdriêk, să) hluê si hnơ̆ng, djăp hnơ̆ng čuăn, hnơ̆ng jăk leh anăn bi hmô. Hdră gĭr ktưn mâo ƀiă êdi 80% ênoh să hlăm kluôm ala djăp hnơ̆ng čuăn krĭng ƀuôn sang mrâo, hlăm anăn, mâo hlăm brô 40% ênoh să djăp hnơ̆ng čuăn krĭng ƀuôn sang mrâo hnơ̆ng jăk, 10% ênoh să djăp hnơ̆ng čuăn krĭng ƀuôn sang mrâo bi hmô, gĭr ktưn truh thŭn 2025 kluôm ala amâo lŏ mâo ôh să ti 15 hnơ̆ng kčah; mđĭ ai dŭm alŭ wăl mâo klei găl pral mkŏ mkra krĭng ƀuôn sang mrâo bi hmô. Khua bruă kƀĭn ala Vương Đình Huệ mtă brei mbha prăk bi liê, kƀĭn mđing kơ hdră kñăm ala čar mkŏ mkra krĭng ƀuôn sang mrâo wưng thŭn 2021-2025, wăt prăk duh bi liê, prăk mă bruă; prăk knŭk kna, gưl dlông leh anăn alŭ wăl, tuh êyuh jih ai tiê kơ hdră bruă.

Pô mblang: H’Zawut Ƀuôn Yă