VOV4.Êđê- Aguah hruê 13-7, brei klei blŭ mguôp kơ dŭm hdră kčah mđĭ kyar bruă duh mkra - ala ƀuôn, hdră kčah ngăn prăk ala čar, hdră kčah čan, tla nư knŭk kna leh anăn hdră duh bi liê knŭk kna wưng man dưn, wưng thŭn 2021-2025, Dhar bruă kƀĭn ala tŭ ư hŏng hdră mơ̆ng knŭk kna kơ klei bi liê prăk knŭk kna wưng anei mĭn tĭng lu hĭn wưng êlâo jing 3,7% GDP. Dhar bruă kƀĭn ala lač: Boh klei bruă duh mkra ka đĭ kyar ka hơĭt kjăp. Klei hmaĭ mơ̆ng yan adiê, angĭn êbŭ, trô̆ msĭn mâo boh jhat kjham. Boh nik, klei ruă tưp Covid-19, hluê si klei ksiêm dlăng ka ƀuh jih ôh klei dleh dlan gun kpăk mơ̆ng anôk bruă mnia blei leh anăn mnuih ƀuôn sang. K’iăng Khua bruă kƀĭn ala Trần Thanh Mẫn mtă brei ksiêm dlăng êlam hĭn dŭm klei edu kƀah hmaĭ kơ bruă ngăn prăk, hrui wĭt bi liê wưng êgao, boh nik klei hmaĭ mơ̆ng klei ruă Covid-19. Boh nik klei kpĭ tla nư knŭk kna leh anăn bi liê knŭk kna. Ăt hlăm aguah 13-7, Dhar bruă kƀĭn ala brei klei blŭ mguôp kơ klei hâo hưn čih klei blŭ, klei akâo mơ̆ng phung bi ala kơ mnuih ƀuôn sang kluôm ala mơĭt kơ klei bi kƀĭn tal 1, Quốc hội gưl 15.

Pô mblang: H’Zawut Ƀuôn Yă