VOV4.Êđê- Čiăng lŏ mâo hruê mmông mlih mrâo klei bi kƀĭn tal 1 mơ̆ng bruă kƀĭn ala gưl 15 tui si klei čiăng bi hrŏ hĕ mmông bi êdah klei hưn mdah, mđĭ mmông bi êdah klei ksiêm êmuh djŏ klei bhiăn. Čiăng kơ dŭm čô pô bi ala bruă kƀĭn ala mâo mmông ksiêm dlăng lehanăn brei boh blŭ. Anei jing klei mñă klă mơ̆ng khua bruă kƀĭn ala Vương Đình Huệ hlăm klei kƀĭn kơ bruă mprăp kơ klei kƀĭn tla 1 mơ̆ng bruă kƀĭn ala gưl 15 mơ̆ng dhar bruă gĭt gai bruă kƀĭn ala hlăm tlam hruê 14/6, ti Hà Nội. Tui si klei mĭn tĭng, klei kƀĭn tal 1, bruă kƀĭn ala gưl 15 mâo hruê mmông mă bruă jing 11,5 hruê, hlăm anăn, bruă kƀĭn ala srăng mprăp 5 hruê kơ bruă dăp mnuih mă bruă, 4,5 hruê kơ bruă ksiêm dlăng dŭm klei hưn mdah lehanăn dŭm boh phŭn mkăn, lehanăn 0,5 hruê pioh kơ bruă mprăp, kčưm pŏk lehanăn bi ruĕ 1 hruê hŏng sa hruê mprăp. Hlăm klei bi kƀĭn, dŭm čô khua êmua hlăm dhar bruă kƀĭn ala tŭ ư srăng kčưm pŏk klei kƀĭn tal 1, bruă kƀĭn ala gưl 15 ti hruê 20/7 kơ năp. Kyua anei jing klei kƀĭn tal 1 lehanăn čiăng bi kluôm ênŭm mnuih mă bruă, sơnăn srăng ngă klei kƀĭn klă anăp. Hlăm anăn mâo hlăm brô 500 čô pô bi ala. Kyuanăn dŭm čô khua êmua hlăm dhar bruă kƀĭn ala mtă: čiăng mâo klei prăp kơ bruă gang mkhư̆ klei ruă tưp Covid-19 jăk klă. Ăt hlăm tlam hruê 14/6, dŭm čô khua êmua hlăm dhar bruă kƀĭn ala ăt mâo klei blŭ kơ hdră êlan ksiêm dlăng mơ̆ng bruă kƀĭn ala, dhar bruă kƀĭn ala thŭn 2022.

Pô mblang: Y-Ƀel Êban