VOV4.Êđê- A Gut, mnuih djuê ana Sêdăng ti ƀuôn H’Rĭng, să Êa Hđĭng, kdriêk Čư̆ Mgar, čar Dak Lak jing sa čô hlăm ênuk gưl mrâo ƀiădah khăp m’ai êdi kơ kdrăp tông ayŭ djuê ana pô. Hŏng klei thâo lehanăn mâo ama ñu jih ai tiê mtô bi hriăm anăn ñu amâo djŏ knŏng thâo tông ayŭ kdrăp djuê ana ƀiădah lŏ thâo mmuñ lu ênhiang mmuñ djuê ana Sedăng.

Djă đĭng trưng nao mŭt hlăm adŭ mă asăp anôk bruă jưh dôk ti Lăn Dap Kngư mơ̆ng sang mđung asăp blŭ Việt Nam, čiăng tông kơ phung knhăk thâo mmuiñ ênhiang djuê ana pô, Agut lač: Kyua klei khăp yơh mơ̆ng điêt mtam ñu mâo ama mtô kơ klei thâo hlăp pĕ brô̆, lehanăn kdrăp pĕ tông mkăn. Leh thâo păn kjăp kơ hdră êlan klei hlăp anăn ñu lŏ tui hriăm tông čing, tông ting ning, tơrưng...

Ama ñu jing pô knhăk Ablôih, jing mnuih hur har êdi kơ bruă kriê pioh, lehanăn mđĭ bi lar klei tŭ dưn dhar kreh djuê ana Sedang.Mơ̆ng sui leh gŏ sang ñujing leh anôk kơ phung mbruă nao hriăm mjuăt tông čing, tông t’rưng, ting ning. Kyuanăn, mơ̆ng ñu hlăk điêt mtam A Gut hdĭp hlăm anôk mâo klei pĕ tông kdrăp djuê ana pô. Kyua mơ̆ng klei anăn yơh đru mjut leh ai tiê klei mĭn ñu atăt ñu tui tiŏ bruă lŏ bi kơrŭ jih kdrăp pĕ tông djuê ana pô.

“Hriăm djă yua kdrăp pĕ tông djuê ana pô jing dleh snăk, gĭr yơh čiăng kơ êmăt tui hriăm. Boh nik tông ting ning jing dleh êdi, hlăm ƀuôn knŏng mâo mă 1; 2 čô mnuih đuič thâo hlăp, tông t’rưng ăt ƀiă mơh mnuih thâo hlăp, bi kâo thâo hlăp mbĭt hŏng đĭng ting ning”.

A Gut pô thâo mmuiñ ênhiang mmuiñ djuê ana Sêdang

Mâo klei êmăt mơ̆ng amĭ ba ama ƀă. Pô knhăk hlăm kdrăp pĕ tông djuê ana pô A blôih lŏ čuê leh kơ AGut, snăn knư̆ hĭn mơh mjuăt hriăm čiăng bi raih klei thâo, lehanăn dưi lŏ mtô bi hriăm kdrăp pĕ tông djuê ana pô kơ mnuih mkăn. A Blôih lač:

“Êlâo hĭn kâo mtô bi hriăm ñu pĕ gitar đuič, bi tông t’rưng jing ñu pô čŏng hriăm mă. Nuu êmăt mđing hmư̆ lehanăn tui hriăm tui hlăp. Kâo mtô mnuih mkăn ñu ktuê hmư̆ lehanăn tui hriăm tinăn, kyuadah ñu jing mnuih êmăt snăk”.

Mâo hŏng anei 20 thŭn, hlăk anăn ñu mrâo 20 thŭn, iêo mŭt hlăm êpul tông čing – kưt mmuiñ ƀuôn H’Ring. Ñu kreh bi mguôp nanao hlăm djăp klei huă mnăm ƀuôn sang mkŏ mjing msĕ si huă êsei mrâo, ngă yang akŏ pin êa mnuih Sedang. Thŭn 2004, ñu mbĭt hŏng êpul tông čing nao mdah hlăm knăm bi hdơr 100 thŭn hrue mkŏ mjing lehanăn rŭ mdơ̆ng ƀuôn prŏng Ƀuôn Ama Thuôt, Festival kphê Ƀuôn Ama Thuôt mơ̆ng čar Daklak mkŏ mjing, lehanăn lŏ hiu mdah hlăm dŭm alŭ wăl mkăn. Tui si A Gut, jih jang klei hiu mdah msĕ snăn, hlăm ñu lŏ mâo lu klei bi hriăm, lŏ mđĭ hĭn klei khăp kơ klei kưt mmuiñ, lehanăn kdrăp pĕ tông djuê ana pô.

“Êlâo dih nao mdah ti Pleiku lehanăn truh kơ knăm bi hdơr 100 thŭn hrue mkŏ mjing lehanăn mđĭ kyả rƀuôn prŏng Ƀuôn Ama Thuôt, ti ƀuôn Đon ăt nao mơh. Ti kdriêk, ti să ya bruă hlăm buôn sang mâo, amâodah iêo kâo nao mtô phung hđeh tông čing, tông t’rưng”.

Pô thâo mbruă A Gut mmuiñ ênhiang mmuiñ djuê ana Sêdang ti adŭ mă asăp mmuiñ VOV ti Lăn Dap Kngư

Jing mnuih hlăm sa boh ƀuôn, kreh hmư̆ dŭm mta klei A Gut kưt mmuiñ, thâodah tông pĕ kdrăp djuê ana pô mbĭt hŏng êpul tông čing ƀuôn H’Ring mdah H’Bu, ti să Êa Hđing, kdriêk Čư̆ Mgar, čar Daklak lač:

“leh ală ƀuh knga kâo hmư̆, A Gut jing mnuih mbruă kơ kdrăp pĕ tông djuê ana pô, ñu lŏ kriăng mtô kơ puhng hđeh hriăm tông čing. Jing sa čô mnuih thâo hlăp đĭng t’rưng, thâo tông čing, A Gut mtô leh kơ phung hđeh hriăm hră gưl 2 tông čing pioh nao bi lông hlăm kdriêk, hlăm čar mơh”.

A Mang, k’iăng khua adŭ bruă dhar kreh hâo hưn kdriêk Čư̆ Mgar, čar Daklak brei thâo, grăp blư̆ alŭ wăl mâo bruă yuôm bhăn iêo nanao êpul ttông čing – kưt mmuiñ ƀuôn Hring, hlăm anăn amâo mâo tuôm kƀah ôh A Gut.

“A Gut mơ̆ng điêt khăp kơ kdrăp pĕ tông djuê ana pô, tui hriăm mơ̆ng ama tông čing, tông t’rưng, ting ning. Ama mmuiñ ênhiang djuê ana Sedang ñu ăt tui hriăm, ară anei A Gut thâo lu mta leh. A Gut jing sa čô mnuih mâo klei thâo khăp êdi kơ klei muiñ ênhiang djuê ana pô, lehanăn thâo raih pĕ tông kdrăp djuê ana, ñu lŏ kriăm mtô bi hriăm phung hđeh hriăm hră tông čing msĕ mơh. Ñu knhăk msĕ hŏng ama ñu mơh, jing sa čô mnuih mâo klei khăp prŏng, thâo gĭr hlăm klei hriăm êmuh mơ̆ng mnuih mduôn khua. Grăp blư̆ mâo klei bi lông tông čing čhar ti kdriêk, čar ñu nao jih”.

Dưi lač, A Gut jing “Anak čuê ba mơ̆ng ama” hlăm êpul kưt muiñ ênhiang djuê ana ti kdriêk Čư̆ Mgar, čar Daklak. Hŏng klei khăp kơ kdrăp pĕ tông mâo leh mơ̆ng amĭ ba ama ƀă, lehanăn lŏ hdĭp hŏng sa čô ama jing mnuih knhăk êdi anăn jing A Blôih kđiăm hlăm klei mjuăt bi hriăm, čung ba snăn A Gut knư̆ hĭn mơh mâo klei myun dưn yua jih klei khăp pô mâo leh hlăm êrah ai tiê. Ñu hdĭp hlăm anôk pĕ tông kdrăp djuê ana pô hlăm găp djuê lehanăn hlăm ƀuôn; mjut leh ai tiê klei mĭn ñu đĭ prŏng lehanăn khăp nanao hlăm klei kưt muiñ lehanăn pĕ tông kdrăp djuê ana pô./.

Pô mblang: Y-Khem Niê