"Ơ Yang! Akâo kơ phung Yang čư̆, Yang êa, Yang lăn, Yang êa krông êa hnoh. Akâo kơ amĭ ama mâo klei suaih pral, hdĭp sui, êđăp ênang. Akâo kơ Yang suôt jih klei amâo myun, brei kơ anak čô ngă bruă găl jăk, klei hdĭp jăk yâo, mơak mñai...”

 Ti  krah wăl anôk hơuh mđao sang krum, ti djiêo čeh kpiê, ênai riu yang pô riu yang kwang msĕ klei mkŏ anak mnuih hŏng phung yang, plah wah ară anei hŏng phŭn agha. Anei jing knăm hdơr knga mơ̆ng Nay H'Ruyn (khăng iêô jing Amĭ Hiên) leh anăn Ksor Hŭ (khăng iêô jing Ama Hiên) kơ amĭ diñu khua thŭn leh jing Ksor H'Lang ti ƀuôn M'lah, să Phú Túc, čar Gia Lai.

 Hlăm ai êwa jăk mơak ti ƀuôn Mlah, sang krum gŏ sang Ama Hiên mâo lu mnuih ƀuôn san riêng gah nao đru, mprăp mnơ̆ng ngă yang kơ knăm hdơr knga. čeh kpiê dưm ti krah sang. Mnŭ, ŭn, čĭm ghang mprăp leh. Găp djuê, mnuih ƀuôn sang hlăm ƀuôn nao hlăm mbĭt mơak mñai. Ama Hiên brei thâo, hŏng mnuih Jarai, knăm hdơr knga amâo djŏ knŏng mkă hŏng hlao mnơ̆ng ngă yang djăp ênŭm amâodah ênoh mnơ̆ng ôh. Klei yuôm bhăn hĭn jing ai tiê hdơr knga phung anak kơ amĭ ama.

Mnuih Jarai ngă knăm hdơr knga amâo djŏ čiăng hưn mdah ôh. Tui hlue si klei  găl gŏ sang, mâo đa đa kŏng mnŭ, ŭn leh anăn dŭm čeh kpiê. Klei yuôm bhăn hĭn jing ai tiê phung anak čiăng mni lač jăk kơ amĭ ama ƀă kkiêng, rông ba leh pô truh kơ prŏng.”

Leh klei riu yang mơ̆ng pô riu yang, klei bhiăn yuôm bhăn dưi ngă. Phung akâo kơ amĭ ama mnăm kpiê čeh tal êlâo, mđup brei ao djuê ana, buê amâodah kông- dŭm mta mnơ̆ng dhơ̆ng  điêt ƀiădah mơĭt jih ai tiê hdơr knga. Amĭ Hiên bi êdah klei khăp  hŏng kmha khăp hơiêng.

Hruê anei hmei ngă klei anei čiăng hdơr kơ ai tiê amĭ ama ƀă kkiêng, rông ba truh kơ prŏng. Hmei knŏng mâo ƀiă mnơ̆ng điêt leh anăn dŭm mta mnơ̆ng pioh bi hdơr, čang hmăng kơ amĭ suaih pral nanao, hơ̆k mơak hŏng anak čô. Anăn jing ai tiê hdơr knga hmei.”

Amâo djŏ knŏng phung mâo klei hdơr knga mgei ai tiê ôh. Hŏng mnuih ƀuôn sang hlăm ƀuôn, anei ăt jing gưl čiăng hrăm mbĭt lŏ bi hdơr kơ klei bhiăn anak muih. Djăp klei hơêč hmưi, mngan kpiê čeh bi mđup brei mơĭt klei čang hmăng kơ sa gŏ sang jăk mơak, sa ƀuôn sang bi hgŭm. Nay Ar - pô mâo kơhưm ti ƀuôn Mlah - ktuê dlăng jih klei mkŏ mjing. Hlăm ală mta ñu, knăm hdơr knga amâo djŏ knŏng jing sa klei bhiăn ôh, ƀiădah lŏ jing klei hriăm kơ ai tiê hdơr knga dưi lŏ čuê mơ̆ng ênuk anei truh kơ ênuk mkăn.

Amĭ ama rông ba leh anak hlăm dŭm thŭn mlan dleh dlan, djiêo kpur pui, hŏng asăr braih, asăr ktơr. Ară anei anak čô  hriê kơ prŏng, mâo leh gŏ sang mdê mdê, ngă knăm hdơr knga čiăng akâo kơ klei suaih pral kơ amĭ ama. Anăn jing bruă yuôm bhăn snăk, mñă kơ anak čô hdơr nanao ai tiê ƀă kkiêng, rông ba leh”

 Knăm hdơr kơ mơ̆ng Ksor Joan leh anăn Kpă Hmir ti ƀuôn Plei Chuet, ƀuôn hgŭmn An Phú, čar Gia Lai mkŏ mjing hlăm ai êwa hơuh mđao leh anăn mgei ai tiê. Lu mnuih ƀuôn sang hlăm găp djuê mơ̆ng dŭm ƀuôn êlan jĕ giăm taih kbưi nao mbĭt hŏng kdrăp čŭt hơô djuê ana. Hlăm ênai kdrăm kơak mơ̆ng rĭng čing, ung mô̆ amai Kpă H’Sukơ (anak mniê kluč hlăm gŏ sang) mđup brei kông, băn mđao leh anăn pha ŭn ghang, mâo klei bi knăl, bi êdah klei mđing uêñ kơ klei hdĭp trei mđao kơ amĭ ama, amai Kpă H’Sukơ mgei ai tiê:

”Ơ amĭ ama! Hruê anei kâo knŏng mâo ƀiă mnơ̆ng myơr kơ amĭ ama. Mni lač jăk kơ amĭ ama ƀă kkiêng, rông ba leh hmei jing mnuih. Hmei knŏng čang hmăng amĭ ama suaih pral nanao, hdĭp sui čiăng mơak hŏng anak čô.”

Năng ai hŏng grăp čô ama, grăp čô amĭ, klei jăk mơak hĭn amâo djŏ jing mnơ̆ng mđup brei ôh, ƀiădah dưi ƀuh anak čô pô hriê kơ prŏng, thâo hdơr kơ phŭn agha. Kpă Hmir ăt mơak leh anăn mgei ai tiê ti anăp klei phung anak hriê kơ prŏng, boh nik klei hdơr knga hŏng amĭ ama pô.

Hlăk êlâo amĭ ama ƀun snăk, rông ba phung anak hŏng jih jang mnơ̆ng pô mâo. Hruê anei dlăng phung anak hriê kơ prŏng, thâo hdơr kơ amĭ ama, hmei mơak leh anăn hdơr knga lu snăk. Knŏng čang hmăng phung anak suaih pral nanao, gŏ sang jăk mơak.”

 Ti krah klei hdĭp mrâo mrang, hlăk lu klei bhiăn djuê ana ƀrư̆ luč ram, knăm hdơr knga mnuih Jarai ăt dưi kriê pioh msĕ si sa klei mkŏ ênuk leh êgao hŏng ară anei. Hlăm sang krum, djiêo čeh kpiê leh anăn hlăm ênai čing kwang, klei mni lač jăk kơ amĭ ama amâo djŏ knŏng jing klei blŭ ôh, ƀiădah lŏ mơĭt hlăm djăp klei bhiăn, djăp mta mnơ̆ng, hlăm klei anak čô djă kiê kngan./.