Hlăm boh sang kyâo čuôr ƀrik jiă leh êa mil sô hđăp, Pô mbruă H’Brơi dôk mmuñ êdu êun êdai jao kơ čô pĭt hŏng ênhiang mmuñ djuê ana Mnông mưng leh. Hlăm dŭm pŏk mtih kyâo jing dŭm hră pah mbi, bi mni mâo kriê pioh leh lu gưl ênuk msĕ si bi mklă kơ klei lŏ čuê mơ̆ng sa gŏ sang jiă knhuah gru cách mạng.

Pô mbruă H'Brơi kkiêng thŭn 1975 hlăm gŏ sang mâo wăt amĭ ama ung leh anăn amĭ ama kkiêng ñu hgŭm hlăm êpul  kahan ba anăp hlăm bruă kđông kahan cách mạng B4 Nâm Nung hlăm dŭm thŭn mlan bi kdơ̆ng hŏng Prăng leh anăn Mi plah miă. Amĭ kkiêng hlăk ƀuôn sang mrâo mtlaih êngiê, lăn čar hluh lir, hriê kơ prŏng hlăm ênai čing ama, kma asăp mmuñ mơ̆ng amĭ, klei khăp kơ dhar kreh Mnông jiă kma leh hlăm ai tiê klei mĭn ñu mơ̆ng hlăk hđeh. Pô mbruă H’Brơi brei thâo:

"Kâo thâo leh anăn tuč lu ênhiang mmuñ djuê ana mơ̆ng điêt. Hlăk êlâo, grăp blư̆ ƀuôn mâo knăm mơak, kâo khăng hlue amĭ nao mmuñ. Dôk ti sang snăn hmư̆ amĭ mmuñ mjum anak, mjum čô kyua anăn ƀrư̆ ƀrư̆ jiă hlăm pô. Hriăm ênhiang mmuñ djuê ana ăt kăn đei dleh mơh, yuôm bhăn hĭn jing gĭr mđing hmư̆, hdơr leh anăn tui hriăm...”

 Hŏng mnuih Mnông, ênhiang mmuñ djuê ama amâo djŏ knŏng jing asăp mmuñ ôh ƀiădah lŏ kriê pioh hƀuê ênuk, klei bhiăn leh anăn knhuah hdĭp êpul êya. Mơ̆ng klei mmuñ mjum, mmuñ bi kmlah truh kơ klei khan (Ot Ndrong), jih jang mâo asăp mtô aduôn aê kơ klei khăp, klei bi hgŭm leh anăn ai tiê mă bruă. Ară anei Pô mbruă H'Brơi lŏ mtô klei khăp ênhiang mmuñ djuê ana kơ ênuk lŏ čuê.

 Hriê prŏng hlăm asăp mmuñ amĭ, amai H'Như, anak mniê H'Brơi hnưm mguôp hlăm bruă dhar kreh djuê ana ti ƀuôn sang. Ară anei, ñu jing Khua Êpul kdŏ ênhiang djuê ana Mnông ti să Nâm Nung.

"Mơ̆ng điêt kâo hlue leh amĭ nao hriăm mmuñ, hriăm kdŏ hŏng phung hlăm êpul dhar kreh djuê ana să. Amĭ jing khua êpul kyua anăn kâo khăng hmư̆ ênhiang mmuñ djuê ana, klei kdŏ djuê ana leh anăn ƀrư̆ mâo klei khăp kơ ênhiang mmuñ djuê ana leh anăn klei kdŏ Mnông pô.”

Jing khua êpul êdam êra ƀuôn Ja Rah, să Nâm Nung, amai H'Như dlăng bruă răng kriê dhar kreh djuê ana ăt jing bruă phung hlăk ai. Dŭm mmông bi kƀĭn êpul êdam êra  hlăm mmăt amâo djŏ jing anôk phung êdam êra bi trông bruă mă ôh ƀiădah lŏ jing anôk hriăm mjuăt kdŏ mmuñ ênhiang djuê ana. Jih jang phung êdam êra leh anăn phung hđeh hlăm êpul êdam êra ƀuôn Ja Rah mâo hlăm brô êbeh 30 čô, hlăm anăn đa đa   phung êdam êra mâo ruah hlăm êpul kdŏ mmuñ ti să Nâm Nung kyua H’ Như ngă khua. Amai H’Như brei thâo:

"Lu phung êdam êra hlăm êppul kdŏ jing phung êdam êra hlăm ƀuôn kyua anăn klei mtrŭt mjhar hriăm mjuăt găl ênưih. Hmei khăng bi mguôp mmông hriăm kdŏ, hriăm mmuñ hlăm mmông bi kƀĭn ƀuôn, mjing tač hlăp jăk kơ phung êdam êra, đru kriê pioh răng mgang ênoh yuôm dhar kreh djuê ana.”

 Grăp gưl knăm mơak amâodah klei mkŏ mjing dhar kreh djuê ana, rup dua amĭ anak H Brơi hrăm mbĭt kdŏ mmuñ mưng leh. Ti krah ênai čing kwang kluôm ƀuôn sang, amĭ  mmuñ ênhiang mmuñ djue ana êdu êun, jăk siam. Anak mniê hlai mbĭt hŏng klei kdŏ êdu êun.

Hlăm dŭm thŭn giăm anei, êpul kdŏ mmuñ ênhiang djuê ana să Nâm Nung hgŭm hlăm lu  klei mdah, mjĕ êrô dhar kreh hlăm kluôm ala leh anăn mâo lu klei pah mni. Leh anăn H'Brơi, amai H’Như dôk lŏ dơ̆ng mtô klei khăp dhar kreh Mnông truh phung hlăk ai. H'Thương Knul, K’iăng Khua Anôk bruă dhar kreh - ala ƀuôn Êpul gơ̆ng bruă ƀuôn sang să Nâm Nung brei thâo:

"U Nhim (H'Brơi) ară anei jing khua êpul tông čing - mmuñ ênhiang djuê ana, bi anak mniê klam ngă khua êpul kdŏ djuê ana. Hlăm lu thŭn êgao, dua amĭ ama gĭr hgŭm kriê pioh leh anăn mtô kơ dhar kreh djuê ana phung mda asei. Hlăm dŭm thŭn êgao, êpul phung mbruă dhar kreh djuê ana mâo Pô mbruă H'Brơi hgŭm nao leh hlăm lu klei bi lông, rang mdah hlăm čar leh anăn êngao čar. Hjăn ti knăm mơak dhar kreh djuê ana mkŏ mjing ti Quảng Trị thŭn 2024 mrâo êgao, êpul mâo mă leh 9 klei pah mni, hlăm anăn mâo 4 klei pah mni A hŏng lu klei pah mni B leh anăn klei pah mni C hlăm dŭm boh phŭn.”

Mơ̆ng boh sang điêt ti ƀuôn Ja Rah, Pô mbruă H’Brơi dôk gĭr lŏ dơ̆ng čuê knhuah gru gŏ sang hŏng dŭm bruă mă tŭ dưn kơ ƀuôn sang. Tơdah ênuk nao êlâo đru hlăm bruă cách mạng snăn ênuk ară anei dôk đru kriê pioh mđĭ lar knhuah dhar kreh djuê ana. Mơ̆ng asăp aduôn mjum pĭt, ênhiang mmuñ djuê ana mơ̆ng amĭ truh kơ ênhiang kdŏ anak mniê, phŭn agha dhar kreh Mnông ăt hơĭt kjăp hlăm dŭm gưl ênuk, čiăng kơ ênai čing, asăp mmuñ kwang nanao ti krah ƀuôn sang hruê anei.