Hlăm sang krum dlông, ênai čing kwang hŏng klei êmưt. Grăp ênai kwang mâo phung thâo mbruă mđing hmư̆, bi mgăl čiăng djă pioh boh sĭt mơ̆ng grăp boh čing. Hlăm ring čing anăn mâo sa hlâo čing mâo gŏ sang Siu Chơt, ti ƀuôn Suối Cẩm, să Čư̆ Drăng, čar Gia Lai djă pioh găn lu ênuk gưl msĕ si sa mnơ̆ng yuôm bhăn. Siu Chơt hưn mdah: Grăp boh čing mâo boh prŏng, mâo ênai leh anăn anăn mdê mdê, êjai tông mbĭt mkŏ mjing sa ênai bi kna, bi kƀĭn hdră tông čing mbĭt hŏng klei thâo knhuah gru dưi djă pioh mơ̆ng dŭm ênuk gưl.

“Anei jing čing M’Năm, čing anei kreh tông hlăm dŭm knăm mơak, klei huă ƀơ̆ng, êngao kơnăn tinei lŏ mâo čĭng guh, čing tơ, čĭng mâo kuôp leh anăn čing kpă

Hluê klei klei yăl dliê mơ̆ng Ơi Rôp, hlâo ring čing mâo aduôn aê, amĭ ama djă pioh mơ̆ng dŭm ênuk êlâo. Hlăm dŭm thŭn bi blah, ênai čiang tuôm kwang čiăng mđĭ ai phung êdam êra nao răng mgang ƀuôn sang. Truh kơ ară anei, ênai anăn ăt kwang hlăm knăm tlŏ mnga kơ hđeh, knăm mơak thŭn jŏk, dŭm klei ngă yang gŏ sang, knăm mơak êpul êya amâodah hdră bhiăn čang ênuk, đru bi mguôp êpul êya leh anăn djă pioh dhar kreh mnuih Jarai.

“Đưm dih, êjai nao bi blah diñu kreh tông čing čiăng atăt lĭng kahan nao bi blah. Êjai ƀơ̆ng kbao hmei ăt tông čing anei. Grăp mta čing dưi yua hlăm klei hơ̆k mơak, klei cang ênuh ăt mdê mdê. Čing arap mdê, čing anei mdê. Mnuih Jarai hmei djă pioh čing čhar truh kơ ară anei hlăm dŭm knăm mơak amâodah klei čang ênuh mâo sơăi ênai čing”.

Dlăng kơ hlâo ring čing jing mnơ̆ng yuôm bhăn mơ̆ng gŏ sang pô, Ơi Rôp mmuñ klei klei mmuñ ênhiang djuê ana Jarai kơ sa ênuk ñŭ kma hlăm dŭm mlan knăm mơak. Ñu ktưn hưn kyua hlâo ring čang đưm dưi djă pioh găn lu ênuk gưl, amâo djŏ knŏng mâo ênoh ƀiădah lŏ jing mnơ̆ng kriê pioh hlăm klei hdĭp ară anei.

Ênai hgơr kwang kčưm kơ dŭm knăm mơak mơ̆ng mnuih Jarai amâo djŏ knŏng krơ̆ng kơ ênhiang tông čĭng ƀiădah lŏ mkŏ mjing dŭm klei kdŏ boh hŏng ai hdĭp. Ti ƀuôn Mlăh, să Phú Túc, pô thâo mbruă Kpă Bưn jing sa hlăm ƀiă phung dôk thâo kơ klei tông hdơr anăn.

Hlăm sang krum dlông mơ̆ng gŏ sang pô thâo mbruă Kpă Bưn, hgơr prŏng mâo dưi yuôl ti mtuh sang msĕ hŏng sa mnơ̆ng yuôm bhăn. Anei jing hgơr yua hlăm dŭm knăm mơak msĕ si đĭ dôk sang mrâo, ngă yang pin êda amâodah klei bi mni. Hlăm lam jing 2 boh hgơr mkăn pioh kơ dŭm knăm kơŭ kyăm mkăn msĕ si knăm lui msat amâodah klei djiê brŭ. Hŏng ñu, grăp boh hgơr mâo bruă klam mdê mdê, amâodưi yua mtŭk mtŭl ôh.

Gru kruăk mdê hĭn mơ̆ng pô thâo mbruă Kpă Bưn jing klei thâo tông hgơr.  Êjai mâo knăm mơak, mbĭt hŏng ring čing, ñu ñŭ kma mbĭt hŏng wăl knăm mơak hŏng klei kdŏ êdu êun. Kngan djă giê tông hgơr, mmông tông kơ ƀô̆ hgơr mmông tông ti asei hgơr, mmông tông ti dlông lăn čiăng mkŏ mjing dŭm ênai kma mbĭt hŏng ênai čing. Mơ̆ng klei đĭ trŭn, nao phă hnuă, pha điâo dưi bi êdah klei ktang, klei mbruă. Lu thŭn hŏng anei pô thâo mbruă Kpă Bưn mkra mjing hgơr, mtô klei tông hgơr kơ čô pô jing Ksor Blưh mrâo 15 thŭn.

“Ară anei pô dôk suaih srăng gĭr mtô kơ phung mda asei tông čing, dŭm klei tông čing arap, kdŏ hgơr. Mmông dôk suiah kâo ăt nao anôk anei anôk dih čih rang mdah klei tông čing. Ƀiădah thŭn khua leh kâo knŏng hnămg hmưi phung mda asei khăp kơ ênai čing. Diñu čiăng hriăm kâo mtô mtam, amâo thâo srăng êmuh, ya kâo thâo kâo srăng mtô dŭm anăn. Hlăm klei hdĭp mrâo mrang ară anei arăng lŏ čiăng wĭt hŏng phŭn agha, amâo djŏ knŏng ba ênai čing nao rang mdah hlăm lăn čar ƀiădah lŏ ba truh tar rŏng lăn. Kyuanăn drei srăng gĭr djă poih knhuah dhar kreh aduôn aê drei đưm”.