Hlăm ai êwa hơ̆k mơak mơ̆ng hruê knăm, ti wăl tač hruê 16/4 bŏ hŏng êa mil mnơ̆ng pơ̆k mñam leh anăn ênai kwang mơ̆ng dŭm kdrăp pĕ tông knhuah gru. Ti krah ênai hgơr Paranưng, ênai ki Saranai, ayŏng David, sa čô tuê hriê mơ̆ng Mi hơ̆k mơak brei thâo:

“Kâo khăp êdi kơ ênai kdrăp pĕ tông mơ̆ng mnuih Chăm, ƀuh jăk leh anăn yuôm bhăn hlăm ai tiê, thâo lu hĭn kơ ai tiê anak mnuih. Anei jing mnơ̆ng pơ̆k mñam mơ̆ng mnuih Chăm ti ƀuôn Mỹ Hiệp, jing mnơ̆nh yuôm bhăn djă pioh kơ êdei anăp”.

Hruê knăm klă sĭt mkŏ mjing sa pŏk rup dhar kreh lu êa mil, hơ̆k mơak leh anăn bŏ hŏng klei hmăng hmưi kpưn đĭ hlăm ênuk mrâo. Ai iêo jak mơ̆ng hruê knăm amâo djŏ knŏng dŭm mnơ̆ng mnơ̆ng kriê pioh ƀiădah lŏ jing ai tiê bi mguôp, bi kƀĭn mơ̆ng mnuih ƀuôn sang mơ̆ng djăp krĭng kwar. Dôk ti krah wăl tač lu hra čhiăng gru, Mô Ha Mad,  hriê mơ̆ng čar An Giang hơ̆k mơak brei thâo:

“Knhuah siam mơ̆ng grăp krĭng wăl dưi bi êdah. Kâo jing mnuih Chăm Islam, bi tinei jing Chăm Bà Ni, Chăm H’Roi… Grăp krĭng kwar mâo knhuah mdê mdê, mâo klei bi hlai mbĭt, hluê anăn mđĭ hĭn klei bi mguôp”.

Hruê knăm dhar kreh djuê ana Chăm hŏng hnơ̆ng kluôm ala jing klei bi klă mbruă kơ hnoh hdĭp lă lả mơ̆ng knhuah gru djuê ana hlăm ênuk mlih mrâo. Hŏng čar Khánh Hoà, hruê knăm mâo boh tŭ dưn yuôm bhăn êdi. Leh bi mŭt mbĭt, Khánh Hoà mâo sa wăl anôk đĭ kyar mrâo - anôk bi kƀĭn lu anôk hƀuê ênuk, êa ksĭ, plao ksĭ mbĭt hŏng klei găl kơ bruă hiu čhưn ênguê, kreh knhâo mrâo mrang leh anăn bruă duh mkra êa ksĭ. Anei jing klei găl yuôm bhăn čiăng kơ alŭ wăl bi mguôp pla wah kriê pioh hŏng mđĭ kyar hơĭt kjăp, plah wah kriê pioh hŏng mlih mrâo mbruă. Mñă klă klei yuôm bhăn mơ̆ng bruă djă pioh phŭn agha, Nguyễn Việt Hùng, khua Bruă sang čư̆ êa čar Khánh Hoà lač klă:

“Hmei đăo knang čiăng nao prăl srăng duh bi liê bruă mkŏ mkra ƀiădah čiăng nao kbưi srăng duh bi liê kơ dhar kreh, kơ anak mnuih. Klei anăn amâo djŏ knŏng jing klei hrŏng ruah mơ̆ng čar Khánh Hoà ƀiădah jing bruă klam mơ̆ng čar hŏng klei đĭ kyar hơĭt kjăp mơ̆ng lăn čar, mơ̆ng djuê ana. Grăp ênuk gưl knŏng nao mbĭt hŏng lăn čar sa kdrêč êlan ƀiădah dhar kreh srăng nao mbĭt nanao.

Čiăng dưi ngă hdră tă anăn,Khánh Hoà dôk gĭr bi mguôp hŏng dŭm phŭn, dhar bruă gưl dlông, phung kreh knhâo leh anăn êpul êya čiăng ngă hră mơar UNESCO čih anăn mnơ̆ng kriê pioh dhar kreh amâo mâo êdah klă “Hluê ngăk lei đăo kkuh kơ amĭ Y Ana” mơ̆ng mnuih Chăm hlăm hră anăn mnơ̆ng kriê pioh dhar kreh amâo êdah klă mơ̆ng anak mnuih. Ară anei Khánh Hoà mđing truh bi lar bruă klam jing anôk djă pioh, ksiêm duah leh anăn hưn mdah dhar kreh Chăm mơ̆ng alŭ wăl dhŭng kwar krah leh anăn Lăn Dap Kngư.