Hdră iêô jak phung tŭk knă leh anăn phung thơ̆ng kơ mnơ̆ng ƀơ̆ng huă hriê mơ̆ng Việt Nam, Thái Lan leh anăn Malaysia, 3 ala čar mâo klei găl hlăm bruă mkra mjing, mkra mjing boh durian Ti Talkshow, phung tuê hiu čhưn ênguê hưn mdah 7 mta mnơ̆ng ƀơ̆ng.  Dŭm mta mnơ̆ng ƀơ̆ng jing klei bi mguôp plah wah durian Dak Lak hŏng klei mkra mjing mnơ̆ng ƀơ̆ng tlâo ala čar, mơ̆ng mnơ̆ng ƀơ̆ng tal êlâo, truh mnơ̆ng ƀơ̆ng phŭn leh anăn mnơ̆ng ƀơ̆ng knhal tuč.

Lu phung thơ̆ng kơ bruă lač, boh durian Dak Lak mâo klei găl prŏng čiăng mđĭ kyar dŭm mta mnơ̆ng ƀơ̆ng huă mrâo, đru mđĭ boh tŭ yuôm mnơ̆ng dhơ̆ng lŏ hma tơdah nao mbĭt hŏng hdră hiu čhưn ênguê lehanăn tui ksiêm kơ dhar kreh. Lý Kim Long, K’iăng khua êpul hgŭm tŭk knă êdah êdi Việt Nam, lač:

 “Hruê anei kâo bi mklă bi mguôp plah wah mnơ̆ng kan hdang hŏng durian,   pô ruah hdang jing mta phŭn mdê hjăn leh anăn lu êdi mơ̆ng Phú Yên hđăp bi mguôp hŏng boh durian jing mta mnŏng ƀơ̆ng jăk mơ̆ng Dak Lak. Ăt čiăng ksiêm duah čiăng yua mnâo mnañ durian anei hlăm dŭm mta mnơ̆ng ƀơ̆ng msĭn, mkŏ mjing dŭm mnâo mrâo mrang hĭn kơ tue hiu čhưn, mtrŭt klei blei yua, đru mtrŭt mđĭ kơ bruă hiu chưn ênguê mơ̆ng Dak Lak pô, leh anăn kluôm ala čar Việt Nam.”

Hluê si Anôk bruă mkŏ mjing, Talkshow amâo djŏ knŏng hưn mthâo dŭm hdră mrâo hlăm bruă mkra mjing boh durian ƀiădah lŏ mđing truh mkŏ mkra mnơ̆ng dhơ̆ng hiu čhưn ênguê mdê hjăn mơ̆ng boh mnga alŭ wăl. Dŭm mta mnơ̆ng ƀơ̆ng djŏ guôp srăng dưi ksiêm duah, bi mguôp hŏng dŭm sang huă mnăm, sang jưh ti alŭ wăl čiăng mkăp kơ phung tuê hiu čhưn ênguê hlăm knăm mơak Durian Dak Lak mkŏ mjing hlăm mlan 8 kơ anăp. Nguyễn Quốc Hiệp, K’iăng khua knơ̆ng bruă dhar kreh, mjuăt asei mlei leh anăn hiu čhưn ênguê Dak Lak brei thâo:

 "Hmei iêo jak phung tŭk knă wĭt mkra dŭm mta mnơ̆ng ƀơ̆ng mrâo mơ̆ng mta boh durian kñăm ksiêm dlăng leh anăn mkra mjing dŭm mnâo mnañ mrâo leh anăn čiăng mđĭ hĭn boh tŭ yuôm mơ̆ng boh durian hlăm anôk mnia mblei hlăm ala čar ăt msĕ mơh ti lu ala čar, ba ênoh yuôm hĭn hŏng bruă mnơ̆ng dhơ̆ng durian drei”.