Knhal jih hruê kăm, sang Rông ƀuôn Đak Pơkao, să Tơ Tung, hơ̆k mơak hŏng ênai čing kwang. Mduôn Đinh Plơnh, pô mâo leh lu thŭn mtô tông čing leh anăn klei mmuñ ênhiăng kơ phung mda asei brei thâo:

           "Kâo gĭr mtô kơ phung anak čô thâo kơ čing čhar leh anăn klei mmuñ ênhiang, čiăng kơ dhar kreh djuê ana Bahnar amâo mâo luč ram. Kyua ênai čing čhar kma leh hlăm kđeh êrah pô. Mơ̆ng hlăk dôk điêt hmư̆ ênai čing bŏ mlan, truh kơ mduôn pĭt ală đuĕ nao. Kâo mtă kơ phung anak čô tông čing amâo djŏ knŏng tông khă bi mơak ôh, ƀiădah srăng tông hŏng jih ai tiê, thâo ư̆ ăn leh anăn ñŭ kma mbĭt hŏng dĭng kna. Ênai čing srăng hmư̆ jăk tơdah grăp čô bi sa ai.”

          Ăt khăp kơ klei tông čing, kdŏ čhuang mơ̆ng hlăk dôk điêt, pô thâo mbruă Đinh Hdot uêñ mĭn êdi kơ hdră mnêč leh anăn mngăt êwa mơ̆ng grăp ênhiang čing êjai mtô bi hriăm. Ñu hlăk mblang:

          "Sa ênhiang tông čing mơ̆ng mnuih Bahnar ti Tơ Tung nao mbĭt hŏng sa hdră bhiăn klă klơ̆ng, mmông hơ̆k mơak mdiê mrâo, mmông ênguôt hlăm klei ngă yang tlŏ kbao. Êjai mtô kơ phung hđeh, hmei srăng bư̆ mkra mơ̆ng klei djă giê knah, klei tông brei bi djŏ guôp. Pô ngă nai srăng mâo kơhưm, srăng dưi mâo klei mpŭ hŏng kdrăp pĕ tông djuê ana, sơnăn kơh ênai čing Đăk Pơkao dưi mâo klei djă pioh ti krah čư̆ dliê.”

Êngao kơ ênai čing kdrưh kơăm, dŭm ênhiang mmuñ Bahnar, dŭm klei khan Hơmon ăt jing êa hdĭp rông ba dŭm ênuk gưl, dôk mâo phung thâo mbruă lŏ mtô kơ phung mda asei. Đinh Bri, ƀuôn Đak Pơkao, să Tơ Tung brei thâo:

          "Klei dleh hĭn mơ̆ng klei mmuñ ênhiang jing srăng mâo êwa dlông, mâo ai tiê hlăm klei mmuñ. Ară anei phung hđeh kreh hmư̆ lu klei mmuñ mrâo. Phung mduôn hmei srăng hnêč hlăm mmông tlam mmăt, grăp hruê mdei čiăng mmuñ kơ phung hđeh hmư̆, knŏng čiăng rah hlăm ai tiê diñu klei khăp hŏng klei blŭ, klei mmuñ mơ̆ng aduôn aê.”

          Thâo săng kơ klei mĭn anăn, pô thâo mbruă Đinh Plih, ƀuôn Leng, să Tơ Tung, brei thâo:

          "Hmei gĭr pŏk adŭ mtô tông čing leh anăn klei mmuñ ênhiang ti ƀuôn Đăk PơKao kơ phung hđeh, jih jang klei anăn kyua bruă klam hŏng aduôn aê tâo tiêt leh anăn hŏng êpul êya. Kâo hơ̆k mơak kyua Bruă sang čư̆ êa să Tơ Tung mâo klei uêñ mĭn, mkŏ mjing klei găl. Hmei pluă mbĭt hlăm bruă mtô bi hriăm hlăm yang mdei prŏng, bi kƀĭn ti sang rông. Êjai ƀuh phung hđeh hơ̆k mơak hriê hriăm, dŭm klei êgah êmăn hmei luč jih. Boh tŭ dưn ară anei mâo leh 2 êpul tông čing leh anăn mmuñ ênhiang phung hđeh, leh anăn 3 êpul krah hlăk”.

          Dŭm klei gĭr ktưn amâo mdei mơ̆ng phung mbruă ti Tơ Tung ba leh êlah pui klei khăp mai kơ dhar kreh djuê ana Bana truh kơ phung mda asei lŏ čuê Ayŏng Đinh Văn Anging, sa hlăm dŭm gru mngač êdah êdi hlăm hdră bruă dhar kreh kdŏ mmuñ mơ̆ng êpul êdam êra să Tơ Tung, bi êdah:

“Hmei lač jăk êdi kơ phung nai msĕ si nai Pơnh, nai Hdot amâo mâo uêñ kơ klei suăi êmăn hruê mlam ôh, knŏng mtô kơ hmei. Kâo pô jing sa čô mnuih mda asei, kâo thâo săng klă tơdah hmei amâo kgŭ nao klam bruă, mgi dih leh phung nai mduôn khua, hjiê dhar kreh anăn ti anôk srăng nao? Kâo mtă mtăn brei hriăm bi jăk, amâo djŏ knŏng hriăm tông čing jăk ôh ƀiădah lŏ hriăm klei mdêč čing, hriăm hdră djă pioh dŭm klei tông čing, klei duê đưm čiăng kơ êdei anăp lŏ čuê kơ phung hđeh mda asei hĭn".

          Amâo mdei hlăm bruă kriê pioh dhar kreh hlăm ƀuôn sang, pô thâo mbruă mda asei Đinh Ơng lŏ ba dŭm knhuah siam dhar kreh Bahnar hlăm hla pŏk yang ƀuôn, mđing truh kơ wăl anôk prŏng hĭn:

Dhar kreh mnuih Bahnar ti Tơ Tung pô jăk snăk leh anăn bŏ hŏng klei thâo khăp. Kâo bi mĭn nanao, êngao kơ bruă mdah hlăm dŭm hruê knăm mơak knhuah gru, phung mda asei brei ba yua kdrăp mrâo, hla pŏk yang ƀuôn leh anăn dŭm klei găl bi mjĕ mjuk dhar kreh kluôm ala čiăng hưn mdah čing čhar, klei mmuñ ênhiăng Bahnar truh hŏng tue hiu čhưn jĕ giăm taih kbưi. Êjai dhar kreh knhuah gru nao mbĭt hŏng mđĭ kyar bruă hiu chưn ênguê yang ƀuôn, klei hdĭp mnuih ƀuôn sang srăng đĭ kyar hĭn, leh anăn anăn ăt jing hdră hơĭt kjăp.

Ti gŭ čuôr sang dlông, kpur pui ăt dôk trơ̆ng msĕ hŏng ênuk pô jhŏng ktang Núp, ênai čing čhar mđrăm mbĭt hŏng ênhiang kdŏ čhuang, klei mmuñ djuê ana ăt kwang bŏ čư̆ dliê Tơ Tung. Knhuah gru djuê ana dôk dưi lŏ čuê, đru mkŏ mkra ƀuôn sang Lăn dap kngư jăk siam hĭn.