Dŭm hruê knhal jih hruê kăm giăm anei, krĭng ênao êa Ea Kao, ƀuôn hgŭm Ea Kao, čar Dak Lak jing leh anôk truh jăk siam hŏng dŭm êbâo čô mnuih ƀuôn sang leh anăn tuê hiu čhưn ênguê. Dŭm hdră bruă msĕ si pơ̆ng nưh, waih SUP, mđung hla amâodah kdâo dŭ dôk mjing sa wăl anôk mrâo, mâo lu klei hiu dlăng leh anăn nao mbĭt hŏng lăn adiê. Mơ̆ng sa krĭng ênao êđăp ênang, ênao Êa Kao dôk ƀrư̆ ƀrư̆ mjing anôk truh knhal jih hruê kăm mơ̆ng mnuih ƀuôn sang leh anăn phung tuê.

“Dŭm hruê anei kâo ƀuh phung tuê hriê ti ênao Ea Kao lu sơnăk, boh nik jing mmông tlam. Tinei mâo klei pơ̆ng nưh, waih mranm, kdŏ mmuñ, phung tuê hriê hơ̆k mơak êdi. Kâo ăt hmư̆ leh kơ hdră rŭ mdơ̆ng tač hlăp golf ti Ea Kao ƀiădah truh ară anei ka mphŭn čô̆ mơh, ăt hmăng hmưi mphŭn čô̆ kơ hdră brei ea Kao dưi mlih mrâo, phung tuê hriê lu hĭn, mnuih ƀuôn sang mâo thiăm klei găl mnia mblei”.

Hdră rŭ mkra tač golf  Êa Kao dôk hlăm hdră čuăl mkă mơ̆ng lu thŭn ƀiădah truh kơ ară anei ka dưi pŏk ngă mơh. Tơdah dưi duh bi liê mđrăm mbĭt hŏng hdră mdei msăn, mnia mblei leh anăn dŭm bruă nah tluôn, krĭng anei dưi ba yua jăk hĭn klei găl lăn mnga êa mak, mbĭt anăn mjing thiăm bruă mă leh anăn mđĭ boh tŭ yuôm kơ hdră hiu čhưn ênguê alŭ wăl.

Dak Lak mâo klei găl bruă hiu čhưn ênguê prŏng ƀiădah truh kơ ară anei ka mâo ôh tač golf djăo hnơ̆ng čuăn dưi ba yua. Hlăk êjai anăn, hiu čhưn ênguê golf jing bruă dôk đĭ kyar pral, iêo jak êpul tuê mâo hnơ̆ng bi liê lu leh anăn wưng dôk sui. Kyuanăn, hdră mkăp mrâo bi klă mđĭ kyar 6 hdră bruă tač golf hŏng ênoh êbeh 11.000 êklai prăk ti Ea Kao, Buôn Đôn, Bình Kiến, Tuy An Nam... kñăm mkŏ mjing hdră hiu čhưn ênguê golf mguôp hŏng wăl mdei msăn, dhar kreh lehanăn wăl mnơ̆ng hdĭp. Hluê si Trần Tiến Lợi, Khua êpul hgŭm bruă mnia mblei sang lăn čar Dak Lak, anei jing bruă mâo klei găl mjing boh kdrŭt kơ bruă hiu čhưn ênguê alŭ wăl.

“Drei amâo dưi dlăng kơ golf knŏng jing klei mjuăt ktang asei mlei, ƀiădah lŏ jing bruă duh mkra phŭn. Mkŏ mjing klei bi hgŭm, klei bi mguôp, ngă klei bi mguôp kjăp, tač hlăp golf, tač êdeh phiơr, mdei msăn leh anăn anôk truh, čiăng mkŏ mjing mta bruă hiu čhưn ênguê kluôm. Dŭm hdră čuăl mkă tač hlăp golf mjing leh dŭm krĭng lăn sah kba jing anôk yuôm, mkŏ mjing dŭm pluh êbâo bruă mă.

Amâo djŏ knŏng tač golf, hdră mkra mlih leh bi mŭt mbĭt lŏ pŏk wăl anôk mđĭ kyar bruă hiu čhưn ênguê mrâo hlăk gưl tal êlâo Dak Lak bi mguôp mbĭt anăn klei găl dap kngư leh anăn êa ksĭ. Hlăm anăn 257 hdră bruă mđing jak iêô klei duh bi liê wưng tal êlâo, mâo 32 hdră bruă hlăm bruă hiu čhưn ênguê mdei msăn, tač golf leh anăn mjuăt ktang asei mlei hŏng ênoh giăm 127 êbâo êklai prăk. Krĭng nah Ngŏ dưi tă hdră mđĭ kyar anôk mdei msăn êa ksĭ, tač golf leh anăn wăl anôk hiu čhưn ênguê ƀuôn prŏng; nah Yŭ ba yua klei găl mâo mơ̆ng dliê, bruă lŏ hma leh anăn dhar kreh mơ̆ng giăm 50 djuê ana čiăng mjing dŭm mta mnơ̆ng dhơ̆ng bruă hiu čhưn ênguê mdê hjăn.

Hluê si Lê Phúc Long, K’iăng khua Knơ̆ng bruă Dhar kreh, Mjuăt ktang asei mlei leh anăn Hiu čhưn ênguê čar Dak Lak, hdră čuăl mkă tal anei amâo djŏ knŏng pŏk mlar wăl anôk đĭ kyar ƀiădah lŏ mjing tur knơ̆ng hdră bhiăn yuôm bhăn čiăng jak iêô phung duh bi liê hdră bruă.

“Anei jing tur knơ̆ng hdră bhiăn yuôm bhăn hĭn čiăng iêô jak, jak iêô phung duh bi liê prŏng dôk mđing êdi kơ dŭm wăl anôk hiu čhưn ênguê, anôk mdei msăn. Mta kñăm mơ̆ng bruă hiu chưn ênguê Dak Lak hlăm wưng kơ anăp jing bi liê mđĭ kyar dŭm mta mnơ̆ng dhơ̆ng hiu čhưn ênguê mtah, hơĭt kjăp leh anăn jăk kơ wăl hdĭp mda.”

Čiăng kơ dŭm hdră êlan hlăm hdră čuăl mkă hnưm dưi jing sĭt, Dak Lak bi klă mbĭt hŏng bi leh anôk bruă nah gŭ srăng kƀĭn mkŏ mjing wăl duh bi liê klă mngač, čŏng pô mjing keh lăn jăk, ruh mgaih klei gun kpăk kơ bruă ruh mgaih anôk ala leh anăn hrăm mbĭt hŏng anôk bruă duh mkra hlăm hdră pŏk ngă hdră bruă. Đỗ Hữu Huy, Khua Knơ̆ng bruă sang čư̆ êa čar Dak Lak bi mklă:

Čar Dak Lak ƀuăn mđrăm mbĭt hŏng phung duh mkra hlăm jih jang bruă rŭ mdơ̆ng, ƀuăn pral mjing keh lăn jăk, mđĭ pral bruă čiu hnô, đru, mkŏ anôk dôk mrâo, ruh mgaih anôk ala. Hŏng dŭm hdră bruă phŭn, hdră bruă boh kdrŭt, dŭm bruă mâo klei hmăi prŏng truh kơ bruă duh mkra ala ƀuôn mơ̆ng čar, khua gĭt gai čar srăng gĭt gai ruh mgaih klei dleh dlan, kpăk gun, rơ̆ng kơ bruă ruh mgaih anôk ala dưi ngă hrăm mbĭt, djŏ hdră bhiăn.”

Mơ̆ng ai hdĭp mrâo dôk mkŏ mjing ti ênao êa Kao truh kơ hnơ̆ng trah dlăng đĭ kyar mơ̆ng dap kngư truh kơ êa ksĭ, Dak Lak dôk mâo klei găl bi sĭt sa wăl anôk đĭ kyar pŏk mlar.