Sa hlăm dŭm mta kñăm jing bruă Khánh Hoà klă klơ̆ng ba mdah tur knơ̆ng mrô kơ dhar kreh Chăm leh anăn klei rang mdah online. Bruă mlih mro đru kơ dŭm boh tŭ dhar kreh Chăm dưi kbiă mơ̆ng wăl anôk sang djă pioh amâodah anôk kriê pioh, đru kơ klei ksiêm duah, mtô bi hriăm, hưn mdah leh anăn mkŏ phung tuê hiu čhưn ênguê hlăm leh anăn êngao lăn čar.

Hluê si dŭm knơ̆ng bruă, klei krơ̆ng kơ jơ̆ng phung tuê amâo djŏ knŏng jing wăl anôk siam ƀiădah lŏ jing dŭm klei yăl dliê kơ dhar kreh nah tluôn grăp mnơ̆ng kriê pioh. Mơ̆ng klei ƀuh anei, dhar kreh Chăm amâo djŏ knŏng jing mnơ̆ng kriê pioh ƀiădah lŏ jing klei găl čiăng mkŏ mjing dŭm mta mnơ̆ng dhơ̆ng hiu čhưn ênguê mdê hĭn. Alain Nguyễn, Khua anôk bruă mdei msăn Hoàn Mỹ, čar Khánh Hoà brei thâo:

“Duh bi liê ti Khánh Hoà mâo leh 10 thŭn, ƀrư̆ hruê kâo ƀuh hĭn boh tŭ dưn, knhuah dhar kreh Chăm đru kơ hmei mâo dŭm klei yăl dliê. Kyuanăn, hmei jghŏng čiăng hưn mdah dhar kreh Chăm, hluê anăn, mđĭ kyar dŭm mnơ̆ng dhơ̆ng hiu čhưn ênguê dhar kreh dŭm djuê ana. Amâo djŏ hriê ti Việt Nam knŏng mnei êa ksĭ, amâo djŏ ôh knơ̆ng mâo mnơ̆ng ƀơ̆ng dưi leh, ƀiădah jing dhar kreh brei arăng ksiêm hriăm, arăng lŏ wĭt yăl dliê hŏng anak čô”.

Phung thơ̆ng kơ bruă mñă klă, klei bi mlih mrô dôk pŏk klei găl ba mnơ̆ng kriê pioh dhar kreh Chăm truh jĕ hĭn hŏng phung tuê hŏng dŭm tur knơ̆ng mrô leh anăn kdrăp mrâo mrang. Ƀiădah, čiăng iêo jak phung tuê čiăng ksiêm hriăm kơ dhar kreh, bi mlih mrô ăt srăng mđĭ hnơ̆ng jăk mnuih mă bruă. Êpul phung hiu atăt, pô ngă bruă hiu čhưn ênguê leh anăn mơ̆ng êpul êya dưi mkăp brei klei hriăm, klei thâo čiăng hâo hưn djŏ boh êlam dhar kreh truh hŏng phung tuê.

K’iăng nai prŏng, nai Prĭn Ngô Văn Doanh, sa čô hlăm êpul hgŭm Êpul gơ̆ng mnơ̆ng kriê pioh dhar kreh ala čar mñă klă:

“Kjăp hdră mnêč jing jăk leh, leh anăn găl kơ klei hưn mdah, jing jăk êdi, pral mơh. Ƀiădah klei čiăng êdi srăng thâo săng dŭm boh tŭ dhar kreh, klei hriăm ƀiă knơ̆ng lač mă sơnăn đuč. Boh nik hŏng tuê ala tač êngao, êjai digơ̆ hriê tinei, klei thâo phung tuê ñu mdê mdê, amâo djŏ knŏng nao hlăp lêñ, diñu lŏ thâo hĭn kơ phung hiu atăt”.

Êngao kơ bruă mđĭ hnơ̆ng jăk mnơ̆ng dhơ̆ng hiu čhưn ênguê dhar kreh, bruă pŏk mlar truh kơ phung tuê alâ tačêngao hŏng dŭm mnơ̆ng mdê hin čiăng dưi mâo klei uêñ mĭn hĭn. Sa êlan nao mrâo dưi uêñ mĭn anăn jing mđĭ kyar bruă hiu čhưn ênguê Halal bi mguôp hŏng dhar kreh Islam Chăm.

Hluê si phung ksiêm duah, mbĭt hŏng bruă mđĭ ênoh tuê mơ̆ng krĭng Msăt boh lăn leh anăn dŭm ala čar Islam, bruă mkŏ mjing dŭm mta bruă djăp ênoh čuăl halal bi mguôp hŏng ba yua dhar kreh Chăm srăng pŏk thiăm klei găl đĭ kyar kơ bruă hiu čhưn ênguê. Ayŏng Huỳnh Thanh Tâm, êpul gơ̆ng ksiêm hriăm bruă djuê ana leh anăn anak mnuih ƀuôn prŏng Hồ Chí Minh hlăk mblang:

“Khădah êpul êya phung Islam ti ƀuôn prŏng Hồ Chí Minh amâo mâo lu ôh ƀiădah anei jing anôk bruă duh mkra mrô 1 mơ̆ng lăn čar, dôk iêo jak lu phung duh bi liê, phung tuê mơ̆ng krĭng Msăt boh lăn dưi yua dŭm mta bruă hiu čhưn ênguê halal, nao mbĭt hŏng dhar kreh Islam Chăm ti alŭ wăl ƀuôn prŏng Hồ Chí Minh.

Hŏng čar Khánh Hoà - alŭ wăl mâo Gơ̆ng Chăm êdah êdi mbĭt hŏng êpul êya mnuih Chăm hdĭp mơ̆ng đưm - djă pioh dhar kreh nao mbĭt hŏng bruă klam phŭn mơ̆ng êpul êya. Aduôn Thái Thị Lệ Hằng,  khua knơ̆ng bruă dhar kreh, mjuăt asei mlei leh anăn hiu čhưn ênguê čar Khánh  Hoà lač, êjai mnuih ƀuôn sang nao hgŭm kriê pioh leh anăn bi lar boh tŭ dhar kreh, mnơ̆ng kriê pioh srăng lŏ mkŏ mjing hdră duh ƀơ̆ng hơĭt hŏng klei mđĭ kyar bruă hiu čhưn ênguê.

“Ya ngă drei amâo mâo kriê pioh, amâo mâo bi lar boh tuh dhar kreh êjai phung tuê hriê ti Khánh Hoà arăng srăng thâo tinei mâo êpul êya djuê ana Chăm, jiă kma knhuah gru djuê ana, mâo lu mta mnơ̆ng hiu čhưn ênguê jăk? Hluê anăn, mtô kơ knhuah gru dhar kreh, dŭm mta bruă dhar kreh dơ̆ng luč ram ăt dưi djă pioh.”

Dưi ƀuh, hlăm ênuk mro, kriê pioh dhar kreh Chăm amâo djŏ knŏng jing djă pioh dŭm boh tŭ mơ̆ng êlâo duh ƀiădah mkŏ mjing mjing ai hdĭp mrâo kơ mnơ̆ng kriê pioh. Êjai kdrăp mrâo, klei thâo leh anăn êpul êya bi hriăm mbĭt, dhar kreh Chăm amâo djŏ knơ̆ng dưi djă pioh, ƀiădah lŏ jing ai dưi mđĭ kyar bruă hiu čhưn ênguê, đru mkŏ mjing dhar kreh leh anăn hưn mdah rup Việt Nam truh ti tar rŏng lăn./.