Nao hlăm adŭ hriăm mâo 30 čô hđeh êdam êra ti să Êa Phê. Hlăm 25 mmông hriăm, phung hriăm dưi mâo pô thâo mbruă êdah êdi Y Phôn Ksơr leh anăn pô thâo mbruă êdah êdi Vũ Lân pô  mtô bi hriăm klei tông čing, kdŏ čhuang leh anăn hluê ngă dŭm ênhiang čing đưm mơ̆ng mnuih Êđê. Mbĭt hŏng hriăm klei hriăm, phung hriăm srăng dưi hluê ngă, mbĭt anăn čih pioh, mdar video, mjing mrô kơ hdruôm hră mkăp kơ bruă kriê pioh knhuah gru.

Êlâo anăn, hruê 7/7, bruă dhar kreh mphŭn pŏk adŭ mtô bi hriăm hgơr mdua, čing 3, čing 5 mơ̆ng djuê ana Bahnar ti alŭ Xí Thoại, să Xuân Lãnh; hruê 8/7 mphŭn pŏk adŭ mtô tông hgơr mdua, čing 3, čing 5 mguôp hŏng kdŏ čhuang djuê ana Čam Hroi ti Sang hră čiêm rông phung hđeh mnuih djuê ana ƀiă Đinh Núp, să Phú Mỡ. Mbĭt hŏng adŭ ti Ea Phê, gưl anei Dak Lak pŏk leh 3 adŭ mtô bi hriăm dhar kreh djuê ana, grăp adŭ 30 čô hriăm leh anăn mĭn tĭng bi leh êlâo kơ hruê 30/8.

Hluê si Knơ̆ng bruă Dhar kreh, Mjuăt ktang asei mlei leh anăn Hiu čhưn ênguê čar Dak Lak, leh 3 adŭ mtô bi hriăm tal êlâo, anôk bruă dhar kreh srăng lŏ pŏk lu adŭ hriăm mơ̆ng hdră ala čar kñăm lehanăn pŏk ngă dŭm hdră mtrŭn mrâo kơ bruă kriê pioh dhar kreh čing čhar./.