VOV4.Êđê - Ăt msĕ hŏng dŭm djuê ana mkăn ti Lăn dap kngư, mnuih êđê thâo ba yua dŭm mta djam dliê čiăng mkra dŭm mta mnơ̆ng jăk êdi. Hlăm anăn mâo mta djam hla pŭng yao hŏng mnâo mmih mơ̆ng čĭm lik lehanăn mnâo ƀâo mngưi mơ̆ng hla kpŭng yao. Anei jing sa mta djam ƀơ̆ng mâo mơ̆ng đưm lehanăn mâo boh tŭ yuôm hlăm êpul êya mnuih Êđê.

Hluê si krĭng mdê mdê, mnuih Êđê mâo klei pia kơ Djam kpŭng hla yao mdê mdê mơh, mnuih Êđê krĭng Adham kreh pia “Djam kpŭng yao” amâodah “Djam tê”, bi kơ phung Êđê krĭng Bih pia jing “Djam bai”. Khădah mâo anăn bi pia mdê mdê ƀiă klei tŭk knă leh anăn dŭm mta mnơ̆ng yua tŭk djam anei msĕ sơăi. Mâo H’Lan Niê kreh iêo jing Aduôn Ƀăt ti ƀuôn Kla, să Drai Săp, kdriêk Krông Ana, čar Dak Lak brei thâo, djam anei jing mta djam mâo mơ̆ng đưm leh anăn tŭk mơ̆ng dŭm mta hla djam mâo hlăm war sang, hlăm pưk hma, boh nik amâo dưi kƀah ôh hla yao mrâo khua, mâo êa mĭl mtah khua. “Mơ̆ng mphŭn truh kơ ară anei mnuih Êđê ăt kreh tŭk djam anei, jih jang dŭm mta mnơ̆ng mâo hlăm sang msĕ si trŏng phĭ, êbŭng dưi tŭk sơăi, mâo kđeh čĭm dưm kđeh čĭm, mâo kđeh kan dưm kđeh kan, tơdah amâo mâo knŏng bơ̆ng hŏng hla djam sơnăn đuč yơh. Tơdah čiăng ƀơ̆ng djam kpŭng, ya mta drei srăng duah, msĕ si djam ƀăl, djam ƀlê amâodah hla hbei ƀlang hlăm sang, trong phĭ, amrêč, tơdah mâo wăt êbŭng dưi jih, jih jang dưi tŭk sơăi hŏng djam kpŭng. Hla yao amâo dưi kbah ôh, tơdah amâo mâo êjai pô pla ktơr pô sang mă hla ktơr, amâodah hla djam djiă ăt čiăng msĕ hŏng hla yao, mâo mnâo ƀâo mgưi msĕ hla yao, anăn jing klei tŭk knă mơ̆ng aduôn aê đưm đă leh.”

Aduôn Ƀăt lŏ brei thâo, čiăng ƀơ̆ng djam kpŭng mâo klei jăk, mâo ênŭm mnâo mnañ, pô tŭk srăng thâo klă si ngă srăng tŭk djam anei. Êjai tŭk djam anei srăng mâo lu mnuih, grăp čô grăp bruă mdê mdê, mâo pô tlê braih, pô rao djam, pô tlê amrêč hra…mă êjai blŭ êjai, yăl dliê kơ klei hdĭp. “Tal êlâo drei srăng tram hĕ braih, leh tram pô mă tlê bhĭ jing kpŭng, mă hla yao leh anăn tlê mbĭt, leh anăn pô tŭk sơnăn yơh. Êjai tŭk, tơdah tŭk hŏng êbung srăng tŭk êbŭng êlâo, tơdah čiăng ƀơ̆ng êbŭng msăm drei srăng dưm êbŭng msăm, tơdah čiăng ƀơ̆ng êbŭng mtah drei dưm êbŭng mtah, drei tŭk čiăng kơ êbŭng ñu kba ƀiă leh anăn kar hĕ êa anăn lŏ tuh êa mrâo, tơdah mâo boh plei, boh giêt tŭk mbĭt dưi jih, kđeh čĭm amâodah kđeh kan ăt dưi jih. Tuh êa kpŭng braih leh anăn kwă brei jih jang lĭk mbĭt, dưm amrêč ƀiă ƀơ̆ng jăk êdi yơh”

Djam kpŭng hla yao kreh tŭk hlăm grăp hruê leh anăn dŭm wưng mâo lu mnuih msĕ si knăm huă ƀơ̆ng, bi tuôm gŏ sang amâodah klei djiê ƀrŭ…Êngao kơ anăn, anei jing mta mnơ̆ng ƀơ̆ng jăk yâo mơ̆ng pô sang pioh mdơ̆ng tơdah mâo phung tuê hriê čhưn. Aduôn Ƀăt brei thâo, tŭk djam anei amâo liê lu prăk ôh, ƀiădah jing mta mnơ̆ng ƀơ̆ng jăk yâo, jăk kơ asei mlei. “Ară anei nao čang djiê ti ƀuôn mkăn kâo ăt ƀuh mâo djam kpŭng hla yao, kâo mĭn tŭk djam anei amâo liê lu prăk kăk ôh, ƀiădah jing mta mnơ̆ng ƀơ̆ng jak yâo djuê ana pô kâo ƀuh mâo klei jăk êdi, pô pĕ mơ̆ng dliê, ară anei wĭt pla ti sang.”

Êjai ƀơ̆ng djam kpŭng hla yao mâo mnâo ƀâo mngưi leh anăn mnâo mnañ jăk êdi, djam anei kreh huă hŏng êsei dưi brei kơ pô huă ƀơ̆ng ƀuh klei jăk jĭn. Mnuih djuê ana Êđê khăp čiăng kơ djam anei kyua mâo mnâo ƀâo mgưi mơ̆ng hla yao, klei jăk mơ̆ng kđeh čĭm, kđeh kan mguôp hŏng klei êun mơ̆ng êsei. Djam kpŭng hla yao ênưih tŭk knă ƀiădah brei mâo mnâo mnañ jĕ giăm. Hlei pô tuôm hriê ti ƀuôn mnuih Êđê tơdah ƀơ̆ng mta djam anei amâo srăng dưi wơr ôh mnâo leh anăn klei jăk mơ̆ng djam kpŭng hla yao.