VOV4.Êđê - Klei bi lông kdŏ mmuñ kluôm ala tal 2 thŭn 2021 mrâo mkŏ mjing ti Dak Lak. Dŭm hruê êgao, êpul kdŏ mmuñ hriê mơ̆ng dŭm čar, ƀuôn prŏng hlăm kluôm ala mdah leh kơ mnuih dlăng dŭm hdră kdŏ mmuñ jăk êdi. Grăp čô mbruă, nghệ sĩ, diễn viên lehanăn êpul êya gĭr leh jih ai tiê pô mdah klei kdŏ mmuñ jăk jĭn êdi.

Mă mơ̆ng klei đĭ kyar krĭng lăn leh anăn anak mnuih, êpul kdŏ mmuñ mơ̆ng čar Bình Dương nao hlăm klei bi lông klei kdŏ mmuñ kluôm ala gưl tal 2, thŭn 2021 hŏng hdră mdah mâo akŏ “Bình Dương – Lăn mđao – klei khăp anak mnuih”. Hlăm 2 kdrêč “Krĭng lăn mđao” leh anăn “Klei khăp anak mnuih”, phung ktuê dlăng dưi ƀuh klă grăp wưng hlăm klei đĭ kyar mơ̆ng alŭ wăl, mơ̆ng klei bi hdơr kơ sa ênuk jah ênah ngă hma, mkŏ mjing ƀuôn sang hŏng dŭm ƀuôn ngă bruă đưm. Truh kơ wưng bruă tuh tia mrâo mrang, ênuk mrâo mrang, leh Bình Dương jing ƀuôn prŏng bruă tuh tia, jing anôk iêo ba lu mnuih ƀuôn sang hlăm kluôm ala hriê hdĭp mda, mă bruă knuă.

Trần Thanh Sơn, Khua kiă kriê anôk bruă dhar kreh – klei kdŏ mmuñ čar Bình Dương, ktrâo lač klei kdŏ mmuñ, hdră čih mčeh leh anăn mkŏ mjing hdră brei thâo, dŭm klei kdŏ, mmuñ, pĕ tông, hdră mâo leh êbeh 70 čô kdŏ mmuñ, phung thâo mbruă, phung ngă film, phung knuă druh, mnuih mă bruă nao mdah leh anăn đru kơ bruă nah tluôn. Anei jing klei bi lông mdah klei kdŏ mmuñ mâo klei duh bi liê leh anăn dŭm klei bi hriăm mơ̆ng hmei ăt mkŏ mjing hlăm brô êbeh 2 mlan. Hnơ̆ng tŭ jăk klei bi lông kdŏ mmuñ jing kluôm ênŭm hmei yua boh blŭ mơ̆ng Bình Dương, wăt kơ kdrăp pĕ tông ăt mơ̆ng Bình Dương, msĕ si abŭ khơ̆ng, tŏ, giêt leh anăn dŭm ana đrao, amâodah dŭm pŏk mdhă hmei bi mguôp jing kdrăp pĕ tông djuê ana, čiăng bi êdah sa knhuah mdê jing Bình Dương ya mta mâo srăng hlăp dŏ anăn.

Bi lông klei kdŏ mmuñ kluôm ala gưl tal 2, thŭn 2021 mâo 22 êpul kdŏ mmuñ hŏng êbeh 1.000 čô kdŏ mmuñ, phung ngă film leh anăn phung knuă druh mă bruă kdŏ mmuñ hlăm kluôm ala nao hgŭm. Khădah klei ruă tưp Covid-19 mâo klei hmăi amâo mâo kơ dŭm mta bruă kdŏ mmuñ, ƀiădah dŭm anôk bruă ăt mâo klei gĭr ktưn, hŏng klei mbruă mkŏ mjing hdră, klei dah lu mta mdê mdê. Găn leh klei dleh dlan, klei dleh kpăk kyua klei ruă tưp leh anăn mmông bi hriăm mjêč, phung kdŏ mmuñ gĭr leh jih ai pô čiăng dưi mâo klei kdŏ mmuñ jăk yâo. Pô mmuñ A Tâm, êpul kdŏ mmuñ čar Kon Tum brei thâo:Nao hlăm klei bi lông gưl anei jing ñu mdê hĭn. Kyuadah jing wưng êdei klei ruă tưp, jih jang djăp mta bruă kdŏ mmuñ leh anăn dŭm mta bruă mkăn nao hlăm klei bi lông gưl tal 2 anei mâo phung kdŏ mmuñ dôk čang hmang êdi. Anăn jing klei gĭr mơ̆ng êpul êya, mơ̆ng êpul khua gĭt gai, mơ̆ng anôk bruă leh anăn mơ̆ng phung nai mtô ngă bruă hŏng klei jăk, jih ai hlăm sa wưng bhiâo ƀiădah jih jang mâo klei sa ai.

Amâo djŏ hŏng dŭm anôk bruă nao hgŭm, ƀiădah anôk bruă dhar kreh klei kdŏ mmuñ čar Dak lak ăt mâo klei gĭr ktưn ngă jăk bruă klam jing anôk mkŏ mjing. Hluê si Đặng Gia Duẩn, k’iăng khua kiă kriê knơ̆ng bruă dhar kreh – mjuăt ktang asei mlei leh anăn hiu čhưn ênguê čar Dak Lak, khădah dôk hlăm wưng mnơ̆ng yua dôk mâo lu klei kƀah mkă hŏng hdră kčah klei kdŏ mmuñ hlăm lu hdră, ƀiădah čar mâo leh klei gĭr tŭ drông leh anăn dăp anôk dôk jăk hĭn kơ dŭm êbâo čô kdŏ mmuñ nao hlăm klei bi lông, bi mâo ênŭm hnơ̆ng čoh čuăn mơ̆ng dŭm êpul êya čiăng mâo hdră kluôm ênŭm hĭn, Đặng Gia Duẩn brei thâo: Bruă mprăp kơ klei bi lông anei jing čŏng pô êdi, jih jang dŭm mta phŭn djŏ tuôm hŏng anôk dôk, mnơ̆ng yua, ênai, pui mngač, bruă nah tluôn truh kơ dŭm bruă mkăn mâo čar Dak Lak ngă kluôm ênŭm mơ̆ng bruă điêt truh kơ bruă prŏng mơ̆ng dŭm êpul. Hluê si klei čih yap mơ̆ng dŭm êpul, truh kơ ară anei, pô mkŏ mjing Dak Lak dưi ngă jăk leh bruă klam jing anôk mkŏ mjing.

Mkŏ mjing mơ̆ng hruê 17 -30/6, bi lông klei kdŏ mmuñ kluôm ala gưl tal 2, thŭn 2021 mâo giăm 200 klei kdŏ mmuñ kluôm ênŭm dŭm mta msĕ si: mmuñ, kdŏ, ayŭ, tông hjan, ayŭ, tông mbĭt, hlăp mgưt, mmuñ mgưt, chèo, tuồng. Grăp hdră mâo boh sui mơ̆ng 65 mnĭt truh kơ 100 mnĭt dưi ba leh kơ ƀĭng dlăng dŭm klei yăl dliê hlăm klei hdĭp hŏng dŭm klei kdŏ mmuñ jăk yâo. Anăn jing boh tŭ klei mă bruă leh anăn klei gĭr ktưn mơ̆ng grăp čô thâo mbruă, phung kdŏ mmuñ, phung ngă flim, grăp anôk bruă kdŏ mmuñ čiăng đru mguôp hlăm klei tŭ jing leh anăn bi mlar mơ̆ng klei bi lông anei, ba dŭm mta klei kdŏ mmuñ nao jĕ hĭn hŏng phung dlăng.