VOV4.Êđê - Hlăm dhar kreh mơ̆ng mnuih Êđê, knăm mjing ayŏng adei, amai adei jing sa hdră bruă bi êdah klei bhiăn mjuăt bi hriăm, mâo boh tŭ bi mguôp êpul êya, mkŏ mjing klei bi hgŭm mguôp mơ̆ng dŭm gŏ sang, găp djuê amâo dah plah wah dŭm djuê ana hrăm mbĭt hdĭp mda ti alŭ wăl. H Xíu, pô čih klei mrâo kơ Sang mđung asăp blŭ Việt Nam ti Lăn dap kngư hưn mthâo kơ klei jăk siam mơ̆ng klei bhiăn mjing ayŏng adei mơ̆ng mnuih djuê ana Êđê, ti ƀuôn Drai Sĭ, să Êa Tar, kdriêk Čư̆ Mgar, čar Dak Lak.

Êgao 5 mmông aguah ưm, sang krum dlông mơ̆ng aduôn H’Djuăn Niê, ti ƀuôn Drai Sĭ, să Ea Tar, kdriêk Čư̆ M’Gar, mtlŭk mtlak lu mnuih leh. Y - Thôn Niê leh anăn phung ayŏng adei hlăm găp djuê mâo leh ƀoh mta mbĭt hŏng pô sang čuh ŭn knô leh puah ktrŏ hlăm brô 30 kg, 2 drei mnŭ knô prŏng leh anăn kă dŭm pluh čeh kpiê. Anei jing dŭm mta ngă yang yuôm bhăn yua hlăm knăm mjing ayŏng adei plah wah aduôn H’Djuăn leh anăn Y-Thôn. Y-Thôn Niê yăl dliê:Kâo jing mnuih mơ̆ng ƀuôn Mlăng, dôk mô̆ ti ƀuôn Drai sĭ. Êlâo dih ama kâo leh anăn gŏ sang ti nei jing bi juăt kyuanăn čiăng kâo mjing ayŏng adei. Kâo mjing ayŏng adei hŏng gŏ sang anei êbeh leh 30 thŭn hŏng anei, ară anei lŏ huă ƀơ̆ng čiăng bi hdơr knhuah gru mơ̆ng pô leh anăn čiăng kơ ƀuôn sang pô diñu lŏ čuê klei bhiăn mơ̆ng djuê ana pô lŏ jăk hĭn.

Leh mdơ̆ng jih mnơ̆ng ngă yang, ênai čĭng kwang msĕ si asăp iêo jak grăp čô hmar nao mŭt hlăm sang krum dlông leh anăn kčưm knăm bi mjing ayŏng adei. Phung ayŏng adei êkei leh anăn tuê dôk ti êtung gah, bi kơ pô sang leh anăn phung amai adei mniê dôk ti ôk mâo kpur pui. Kčưm knăm anei, pô ngă yang srăng wir ƀô̆ mta nah ngŏ, iêo kwưh hưn hŏng phung yang leh anăn iêo jak phung aduôn aê atâo tiêt wĭt hgŭm mbĭt. Klei ngă yang anei dưi mkŏ mjing hŏng tlâo blư̆ ngă yang, tal êlâo jing ngă yang kơ aduôn aê atâo tiêt, lŏ dơ̆ng kơ knăn jing klei ngă yang buh kông plah wah 2 čô bi mjing leh anăn knal tuč jing klei ngă yang lač jăk.

Pô ngă yang Y- Čôč Niê brei thâo, hlăm 3 blư̆ ngă yang, klei ngă yang tal 1 leh anăn tal 3 mâo mnơ̆ng myơr jing sa drei mñŭ leh anăn sa čeh kpiê. Bi kơ gưl tal 2 jing yuôm hĭn hŏng mnơ̆ng myơr jing sa drei ŭn knô leh puah leh anăn 5 čeh kpiê. Klei bhiăn buh kông mjing ayŏng adei jing yuôm bhăn sơnăk kyua bi klă klei kuôl kă plah wah 2 čô leh anăn 2 gŏ sang djuê ana. Mơ̆ng ară anei truh kơ jih klei hdĭp, 2 čô leh mjing ayŏng adei srăng jing ayŏng adei sa boh sang, djiê hdĭp mbĭt, knap mnai, yâo mơak mbĭt.Klei ngă yang anei čiăng kơ phung yang, aduôn aê atâo tiêt thâo sơai, hơêč hmưi kơ gŏ sang 2 tĭng mâo klei suaih pral, mă bruă tŭ jing. Bruă buh kông msĕ si klei bi klă kơ klei kuôl kă 2 tĭng, hŏng mnơ̆ng myơr jing sa drei ŭn kñô leh puah leh anăn 5 čeh kpiê, grăp čô êdei anei mâo leh klei bi klă leh anăn thâo kơ klei mjĕ mjĭng mơ̆ng 2 gŏ sang.

Leh grăp blư̆ ngă yang, pô ngă yang mdei bhiâo čiăng kơ pô sang leh anăn phung tuê nao mnăm kpiê čeh, hơêč hmưi kơ 2 gŏ sang, hmăng hmưi klei bi khăo, bi mguôp kjăp kơ 2 gŏ sang mjĕ mjing. Aduôn H’Huyên Ayŭn, khua bruă Đảng nah gŭ ƀuôn Drai sĭ brei thâo, sui leh hlăm ƀuôn lŏ mâo klei ngă yand msĕ sơnei. Bruă mkŏ mjing knăm bi mjing ayŏng adei srăng đru kơ mnuih ƀuôn sang, boh nik jing phung mda asei mâo mmông găl ksiêm hriăm dŭm klei bhiăn, klei ngă yang, knăm knhuah gru djuê ana pô.Hŏng bruă klam jing khua bruă Đảng nah gŭ, kâo pô lŏ dơ̆ng mtrŭt mjhar mnuih ƀuôn sang, ayŏng amai adei lŏ dơ̆ng bi lar knhuah dhar kreh djuê ana pô, čiăng amâo mâo luč ôh dŭm hdră bhiăn, klei ngă yang djuê ana, knăm mjing ayŏng adei ăt msĕ hŏng dŭm klei ngă yang mkăn.

Hluê si Y-Wem H’Wing, k’iăng khua bruă sang čư êa kdriêk Čư̆ Mgar, klei mjing ayŏng adei jing sa hdră bhiăn knhuah gru mơ̆ng djuê ana mnuih Êđê, mâo knhuah mtô mjuăt bi hriăm leh anăn bi mguôp êpup êya yang ƀuôn. Bruă mjing ayŏng adei đru kơ 2 čô amâo tuôm thâo bi krah mjĕ mjing msĕ ayŏng adei sa amĭ, sa ama, dlăng hdơ̆ng pô msĕ ayŏng adei hlăm gŏ sang, bi đru tơdah mâo klei dleh dlan. Kyuanăn, bruă lŏ mkŏ wĭt knăm anei ăt msĕ hŏng dŭm knăm mkăn mơ̆ng êpul êya 24 djuê ana hlăm alŭ wăl srăng đru mguôp hlăm bruă kriê pioh knhuah dhar kreh djuê ana leh anăn mkŏ mjing klei bi mguôp, mđĭ kyar bruă duh mkra ala ƀuôn.Knăm mjing ayŏng adei msĕ hruê anei mâo boh tŭ dưn yuôm bhăn sơnăk hŏng knhuah dher kreh mơ̆ng mnuih djuê ana Êđê, mjing ayŏng adei amâo mâo bi kah djuê anei djuê dih, djuê ana anei, djuê ana dih, ênuk thŭn amâodah êkei mniê. Hlăm êpul êya dŭm djuê ana dưi mâo sơăi klei mjing ayŏng adei leh anăn bi mguôp klei khăp ayŏng adei čiăng mkŏ mjing klei hdĭp mda, ai tiê, mđĭ kyar bruă duh mkra ala ƀuôn leh anăn rơ̆ng kjăo klei êđăp ênang. Mta knăm jing mkŏ mjing klei bi mguôp prŏng hlăm êpul êya yang ƀuôn hŏng klei kjăp.

Hŏng mnuih djuê ana Êđê, knăm mjing ayŏng adei jing sa knhuah dhar kreh jăk siam, bi êdah ai tiê bi mguôp, hrăm mbĭt bi găn klei dleh dlan. Ară anei, lu ƀuôn êlan ăt dôk djă pioh klei bi mguôp plah wah sa čô hŏng sa gŏ sang, djuê ana. Ƀiădah, klei bhiăn anei mâo leh klei klah čŭn, mnơ̆ng myơr ăt hluê si klei thâo mâo hlăm gŏ sang, đa đa knŏng sa drei mnŭ, sa čeh kpiê amâodah sa blư̆ huă ƀơ̆ng hŏng klei bi klă mơ̆ng kluôm ênŭm 2 gŏ sang. Bruă bi mjing ayŏng adei mâo boh tŭ yuôm bhăn leh anăn siam, amâo mâo klei mgô̆, hŏng klei hmăng hmưi jih jang hdĭp êđăp ênang, bi mguôp msĕ si ayŏng anei sa sang, hrăm mbĭt bi găn dŭm klei dleh dlan, knap mñai čiăng mkŏ mjing ƀuôn êlan trei mđao, mdrŏng sah.