VOV4.Êđê - Mmăt hruê 19/6, Bruă Đoàn ƀuôn prŏng Đà Nẵng bi hgŭm hŏng Êpul hgŭm Tsubasa (Êpul hgŭm phung êdam êra ƀuôn prŏng) mkŏ mjing “Knăm bi mjĕ mjuk dhar kreh Việt Nam – Japon” Tsubasa Matsuri 2022” mâo giăm 700 čô êdam êra, phung sinh viên ti dŭm sang hră gưl krah lehanăn gưl prŏng ti alŭ wăl ƀuôn prŏng nao hgŭm. Anei jing hdră bruă ƀri knăm bi hdơr 50 thŭn Hruê mkŏ mjing Klei bi mjĕ Việt Nam – Japon.

Knăm anei bi êdah leh wăl anôk dhar kreh jăk siam mơ̆ng Japon, hưn mdah lehanăn mdah wăl anôk klei bhiăn mnăm čê mơ̆ng Japon, hdră klăp m’ar Origami, rang mdah klei yăl dliê hŏng m’ar mơ̆ng Japon, dŭm klei hlăp djuê ana lehanăn klei bi lông kdŏ mmuñ dŭm êpul êya. Bruă Đoàn ƀuôn prŏng Đà Nẵng brei thâo: Hluê hdră anei đru leh kơ phung mda asei thâo săng hĭn kơ knhuah dhar kreh Japon, mâo wăl anôk tui ksiêm kơ klei blŭ, mơ̆ng anăn srăng mjing kdrông mkŏ plah wah Japon lehanăn Việt Nam./.

H’ Nêč pô mblang