Wưng hdơr hruê djiê mtao Hùng, knăm 30/4 - 1/5 leh anăn yan mdei prŏng 2026, êpul phung tuê leh anăn tuê gŏ sang nao ti Lâm Đồng mĭn tĭng đĭ lu. Čiăng drông phung tuê, êngao kơ dŭm hdră mtrŭt mđĭ, lu anôk mdei msăn leh anăn anôk čuă dlăng mđĭ hnơ̆ng bruă knuă, đru rơ̆ng hnơ̆ng jăk kơ phung tuê. Nguyễn Thị Mai Trâm, pô đru bruă khua kiă kriê Muine Bay Resort (Phan Thiết) brei thâo, anok bruă ba mdah leh hdră mrâo.

Ea ksĭ dôk truh hlăm wưng siam hĭn. Ti Hòn Lao, phung tuê dưi knŭk kna kĭ truh ti êa ksĭ čiăng ñŭ êa dlăng san hô leh anăn waih SUP. Anôk anei mâo čĭm, kôk wĭt ngă hruh kyuanăn phung tuê dưi dlăng, mbĭt anăn dưi ñŭ êa mbĭt hŏng kan leh anăn dlăng san hô.

Đinh Ngọc Khánh Vy, adŭ bruă mnia mblei TTC World - Thung lũng Tình yêu (Đà Lạt) hưn, mơ̆ng akŏ thŭn 2026, anôk bruă ba yua 2 mta mrâo jing êlan hroh dlông rơ̆k leh anăn êlan hroh hŏng kpŭng. Dŭm mta anei đru mkŏ kban ală kĭng Ngàn Thông truh kơ čŏng Mộng Mơ leh anăn Thung lũng Tình yêu, ba truh klei ktuê dlăng jăk êdi kơ phung tuê:

 Hlăm wưng mdei hruê 30/4 leh anăn 1/5, hmei hmăng hmưi srăng drông hlăm brô 25.000 gưl čô tuê, mĭn tĭng đĭ 123% mkă hŏng wưng anei thŭn dih. Hmei dăo knang kyua hlăm wưng hruê knăm anăp anei srăng mâo thiăm mnơ̆ng kơ phung tuê mda asei, gŏ sang leh anăn phung hđeh.

Bruă hiu čhưn ênguê čar Lâm Đồng dôk mtrŭt mđĭ tour êlan jơ̆ng leh anăn tour mkŏ hlăm wưng tač êdeh phiơr Liên  Khương kđăl ƀăng êjai čiăng mkra mđĭ. Nao mbĭt hŏng anăn, klei rang mdah hlăm tur knơ̆ng mrô leh anăn mkŏ mjing hră kak hiu čhưn ênguê čiăng bi jih hnơ̆ng klei hưn kơ phung tuê.

Hluê si Nguyễn Văn Hùng, k’iăng khua êpul bruă hiu čhưn ênguê čar Lâm Đồng, čar srăng mkŏ mjing lu mta bruă prŏng msĕ su: Mlan hiu čhưn ênguê, Festival mnga. Bi hŏng phung tuê mơ̆ng ala tač êngao truh ti Đà Lạt, dŭm anôk bruă hiu čhưn ênguê srăng drông mơ̆ng tač êdeh phiơr Cam Ranh:

Mrâo anei, ti klei kƀĭn trông bruă hiu čhưn ênguê mâo dŭm čar nao hgŭm, jih jang sa ai hŏng bruă hiu čhưn ênguê Lâm Đồng leh anăn ƀuôn prŏng Đà Lạt hđăp Hrô kơ nao pral hŏng êdeh phiơr msĕ hŏng êlâo, ară anei phung tuê dưi đĭ êdeh ti êlan dơ̆ng pral amâodah dŭm êlan mtah. Hmei dăp leh dŭm anôk mdei drông tuê, bi mâo mta kñăm čiăng kơ phung tuê amâo mâo ê’am ôh.

Klei čŏng pô anei dưi mkŏ mjing hluê si klei đĭ kyar hơĭt kjăp. Wưng tlâo mlan tal 1/2026, bruă hiu čhưn ênguê Lâm Đồng drông hlăm brô 6 êklăk gưl čô tuê, đĭ êbeh 20% mkă hŏng wưng êlâo. Boh nik phung tuê ala tač êngao đi lu đru mguôp yuôm bhăn hlăm klei đĭ kyar mơ̆ng bruă hiu čhưn ênguê alŭ wăl.

Năng mđing, leh bi mŭt mbĭ, čar Lâm Đồng ară anei mâo wăl anôk lu jơr, dưi lač jing anôk hiu čhưn ênguê jăk êdi mâo djăp čư̆ dlông, ênao prŏng, êa ksĭ mtah – plao ksĭ siam, mđĭ ai iêo jak hŏng phung tuê hlăm leh anăn êngao lăn car. Đinh Văn Tuấn, k’iăng khua Bruă sang čư̆ êa čar Lâm Đồng mñă ktang:

 Čar Lâm Đồng mâo lu klei găl leh anăn knhuah gru, ƀuăn srăng jing anôk truh mrâo kơ phung tuê hlăm leh anăn êngao lăn čar. Bruă tač êdeh phiơr mđei êjai čiăng mkra mđĭ jing klei amâo găl, ƀiădah klei dưi mjing klei lông dlăng anei jing klei găl prŏng. Anei jing wưng hưn mdah dŭm êlan mrâo, ba phung tuê kơ klei mdê hĭn kơ wăl anôk prŏng mơ̆ng Lâm Đồng.

Hŏng dŭm mta mnơ̆ng jăk mkŏ mơ̆ng dliê truh ti êa ksĭ, bruă hiu čhưn ênguê Lâm Đồng hmăng hmưi sa yang hiu čhưn ênguê wưng bi hdơr hruê djiê mta Hùng, wưng mdei 30/4- 1/5, yan mdei prŏng 2026 srăng hơ̆k mơak hĭn.