Ti anăp dring sang krum dlông, Khua mduôn - pô thâo mbruă Rơ Châm Nha dôk djă ĭn đĭng goong msĕ si sa kdrêc klei lŏ wĭt hdơr, grăp kđiêng kngan ñu pĕ klei đĭng, mjing ênai hmư̆ jăk êdimi. Ală ñu dlăng mơ̆ng kbưi, ktuê dlăng dŭm ênhiang ênai, msĕ si dôk yăl dliê dŭm klei mâo mơ̆ng ƀuôn sang leh anăn asei ñu pô ênuk mda asei.

Anăn jing hlăk ñu 20 thŭn, ñu nao hgŭm bruă du kích ti dŭm alŭ wăl leh anăn nao hgŭm êdam êra nao êlâo, ngă bruă klam ba mnơ̆ng ƀơ̆ng kơ lĭng kahan mblah Mi. Thŭn 1968, ñu dôk mô̆ leh anăn ăt lŏ dơ̆ng ngă bruă du kích ti alŭ wăl. Hlăm dŭm thŭn bi blah, khădah dleh dlan, suăi êmăn, ƀiădah Rơ Châm Nha ăt sa ai hluê Đảng, hluê Awa Hồ, đru kơ bruă krŭ kdơ̆ng mtlaih êngiê kwar Dhŭng - hluh hlir lăn čar.

“Mơ̆ng thŭn  1961-1962, kâo jing sa čô êdam hlăm ƀuôn. Truh thŭn 1963 kâo dưi mŭt đoàn leh anăn truh thŭn 1965 kâo ngă khua êpul du kích. Yang hruê ngă bruă êlam êra, truh kơ mmăt mlam atăt lĭng kahan nao bi  rai dŭm kđông kahan roh. Knuă leh anăn lĭng kahan mmông anăn amâo mâo pô atăt dleh sơnăk thâo bĭt êlan. Kyuadah pô jing mnuih hlăm alŭ wăl, thâo klă boh sĭt phung roh leh anăn kđông kahan roh ti anôk, čư̆ ti anôk, kyuanăn pô atăt lĭng kahan nao bi rai kđông kahan roh tŭ jing”.

Lŏ bơ̆k bâo kơ hruê 30/4/1975 - gru kruăk mtlaih êngiê kwar Dhŭng 30/4/1975 - ală mta khua mduôn - pô thâo mbruă Rơ Châm Nha lŏ mngač hĭn. Ñu brei čô ñu jing Rơ Châm Tứ tông đĭng tơrưng čiăng mbĭt hŏng ñu pĕ gông mơak hruê lăn čar mtlaih êngiê.

 “Klei hơ̆k mơak êdi êjai lăn čar dưi mtlaih êngiê. Leh pô dưi hŏng phung roh, lăn čar dưi mtlaih êngiê, grăp čô mơ̆ng mduôn khua, phung êdam êra ƀuh klei hơ̆k mơak êdi msĕ dưi ruh klei arăng kă, hơ̆k mơak mbĭt hŏng ƀuôn sang. Sa ai hŏng klei iêo mthưr mkŏ mjing êpul êdam êra hâo hưn, sa êpul nao ngă klei kdŏ mmuñ, mđĭ ai hdră bruă, sa êpul nao ngă bruă duh mkra, mkŏ mjing bi kjăp lăn čar ƀuôn sang. Hơ̆k mơak êdi kyua mâo klei êngiê, klei jăk, tông čing, kdŏ čhuang si pô čhiăng yơh”.

Hŏng khua mduôn Rơ Châm Nha, dưi pĕ brô̆, tông čing hlăm wưng bi hdơr 51 thŭn hruê mtlaih êngiê kwar Dhŭng, hluh hlir lăn čar jing mmông kluôm dhuôm hĭn, anôk ênai kdrăp pĕ tông dưi hlai mbĭt hŏng klei ktưn hưn lăn čar, ƀuôn sang mlih mrâo./.