Hŏng êbeh 5,3 êklăk čô mnuih Việt dôk hdĭp lehanăn mă bruă ti ala tač êngao, Knăm bi hdơr Hruê djiê Mtao Hùng jing “Mmông yuôm bhăn” čiăng mđing truh kơ phŭn agha ana hruê̆ pô. Krơ̆ng kjăp klei bhiăn ngă yang Mtao Hùng ti ala tač êngao jing kriê kjăp knhuah dhar kreh Việt, đru kơ ênuk gưl hđeh dôk ti ala tač êngao amâo wơr ôh phŭn agha ana hruê̆ mơ̆ng pô.

Mơ̆ng thŭn 2015, Hdră bi hdơr hruê djiê kơ Mtao Hùng mơ̆ng Việt Nam hlăm tar rŏng lăn dưi pŏk ngă kjăp, đru bi mguôp êpul êya mnuih Việt Nam ti lu ala čar čiăng mkŏ mjing Knăm anei hŏng sa hdră kluôm. Knăm bi hdơr Hruê djiê kơ Mtao Hùng hlăm tar rŏng lăn jing hdră dhar kreh yuôm bhăn, amâo djŏ knŏng hŏng êpul êya mnuih Việt Nam dôk hdĭp, mă bruă, ksiêm dlăng ti ala tač êngao, ƀiădah lŏ đru mtrŭt mđĭ klei bi mjĕ jăk siam plah wah Việt Nam hŏng ƀĭng găp tar rŏng lăn.

Hŏng êpul êya mnuih Việt Nam ti ala tač êngao, Knăm bi hdơr Hruê djiê kơ Mtao Hùng mơ̆ng ala čar Việt Nam hlăm tar rŏng lăn mâo boh tŭ yuôm. Hŏng ênuk gưl dua, gưl tlâo.. đĭ kơ prŏng ti ala tač êngao, anei jing mmông găl čiăng kơ phung hđeh tui ksiêm kơ hƀuê ênuk, klei blŭ amĭ kkiêng lehanăn klei ktưn hưn kơ phŭn agha ana hruê̆ pô. Hlăm boh sang mbĭt, mdê bi klei khăp, bruă mă, klei mđing, klei mĭn… ƀiădah mâo klei khăp prŏng hlăm ƀuôn sang.

Hlăm ai êwa yuôm bhăn, êpul êya mnuih Việt Nam ti čar U-đon Tha-ni (Udon Thani), krĭng Ngŏ Dưr Thái Lan, mkŏ mjing leh Knăm bi hdơr hruê djiê kơ Mtao Hùng. Lương Xuân Hòa, Khua êpul hgŭm mnuih Việt Nam čar Udon Thani, mñă klei mĭn čiăng mơ̆ng mnuih ƀuôn sang dôk hdĭp tinei.

 "Grăp thŭn hmei mkŏ mjing nanao snei čiăng kơ phung čô anak thâo kơ pô mâo êrah mơ̆ng Mtao Hùng. Khădah dưi kkiêng lehanăn đĭ kơ prŏng ti krĭng lăn Thái, ƀiădah êrah Việt Nam ăt êran nanao hlăm kboh grăp čô lehanăn hmei ăt sa ai mđing truh kơ phŭn agha ana hruê̆ pô.

Mđĭ lar boh tŭ yuôm Knăm bi hdơr Hruê djiê kơ Mtao Hùng amâo djŏ knŏng mjưh ti bruă mkŏ mjing dŭm knăm yuôm bhăn biădah yuôm hĭn jing hdră kriê pioh, rông ba ai tiê khăp kơ ala čar lehanăn klei thâo săng bi hgŭm mguôp hlăm grăp čô mnuih Việt Nam. Anei jing phŭn agha ana hruê̆ ai ktang, jiă knhuah dhar kreh jăk siam čiăng kơ djuê ana Việt Nam hơĭt kjăp ñŭ kma. Khădah ti ya anôk, brei drei hdơr kơ hruê pluh mlan tlâo, ngă yang kơ Mtao Hùng, snăn phŭn agha djuê ana ăt dôk nanao, bi mguôp êpul êya mnuih Việt Nam jing sa êpul hơĭt kjăp./.