Ti Đình Lạc Giao, ƀuôn prŏng Ƀuôn Ama Thuô̆t, knơ̆ng bruă dhar kreh, mjuăt ktang asei mlei leh anăn hiu čhưn ênguê čar Dak Lak mkŏ mjing hdră kdŏ mmuñ “Klei mmuñ krưh kơăm mlan 4” hŏng dua kdrêč “Klei mmuñ hluh hlir” leh anăn Dak Lak - Ênai kwang hruê mrâo. Hdră lŏ wĭt bi êdah klei krŭ kdơ̆ng dleh dlan, lŏ bi êdah boh tŭ dưn hƀuê ênuk mơ̆ng klei mblah dưi yan mnga thŭn 1975, boh nik jing klei mblah dưi Ƀuôn Ama Thuô̆t, klei dưi tal êlâo ti kdrăn mblah Lăn Dap Kngư, đru mkŏ mjing klei dưi mơ̆ng hdră mblah Hồ Chí Minh hƀuê ênuk. Mbĭt anănbi êdah klei mlih mrâo mơ̆ng Dak Lak leh êbeh 50 thŭn mtlaih ênguê. Mơ̆ng hruê 30/4 - 3/5, ti ƀuôn prŏng Tuy Hòa mkŏ mjing lu mta bruă hŏng akŏ “Kan Ngư Dak Lak - boh jăk mơ̆ng kdrông mah” nao mbĭt hŏng knă mơak kpŭng đung hŏng êwa - phiơr dlăng yang hruê blĕ, čiăng tŭ drông dŭm hruê knăm prŏng leh anăn hưn mdah bruă hiu čhưn ênguê alŭ wăl.

Ti wăl tač Đại Đoàn Kết, ƀuôn prŏng Pleiku, Bruă sang čư̆ êa čar Gia Lai mrâo mkŏ mjing hdră kdŏ mmuñ mdê hĭn “Ênai Čư̆ čhiăng” bi mni kơ ai ktang klei bi mguôp djuê ana. Hdră jing bruă bi hdơr 80 thŭn hruê awa Hồ mơĭt hră kơ klei kƀĭn prŏng Dŭm djuê ana mnuih djuê ƀiă kwar Dhŭng ti Pleiku, Bi hdơr 51 thŭn hruê mtlaih êngiê kwar Dhŭng, hluh hlir lăn čar. Mta kñăm mơ̆ng hdră jing lŏ bi êdah hră mơĭt mơ̆ng khua gĭt gai Hồ Chí Minh mơĭt kơ mnuih ƀuôn sang dŭm djuê ana mnuih djuê ƀiă thŭn 1946.

Blŭ hrăm hlăm hdră, khua Bruă sang čư̆ êa čar Gia Lai Phạm Anh Tuấn mñă ktang, mâo hŏng anei 80 thŭn, hră mơĭt mơ̆ng khua gĭt gai Hồ Chí Minh kơ klei kƀĭn prŏng dŭm djuê ana mnuih djuê ƀiă kwar Dhŭng ti Pleiku jing leh klei hưn prŏng kơ ai tiê bi mguôp djuê ana, bi kjăp klei đăo knang leh anăn klei mĭn cách mạng.

“Mlam mơak mjĕ mjuk dŭm djuê ana hŏng akŏ “Ênai čư̆ čhiăng” amâo djŏ knŏng jing klei rang mdah dhar kreh, ƀiădah lŏ jing klei mñă klă: Drei mdê mdê ƀiădah amâo mâo bi tlah. Dreu lu jơr ƀiădah sa tur knơ̆ng. Bi hdơr 80 thŭn hdră bruă yuôm bhăn anei, klei yuôm bhăn hĭn amâo djŏ ôh lŏ bơ̆k bâo klei Awa blŭ, ƀiădah thâo dăng klă boh tŭ dưn, klei mĭn mơ̆ng Hồ Chí Minh kơ klei bi mguôp djuê ana, lŏ dơ̆ng bi sĭt hŏng bruă ngă klă klơ̆ng leh anăn boh tŭ dưn hŏng klei đăo knang ktang phĭt. Ala čar Việt Nam jing sa, djuê ana Việt Nam jing sa. Êa krông dưi khuôt, čư̆ dưl klưh, ƀiădah klei sĭt anăn amâo mâo mlih ôh”.